Wang léchüen yéngi yilliq chay ziyapitide muqimliqni tekitlidi

2007-12-30
Élxet
Pikir
Share
Print

29 - Dékabir küni kechte Uyghur aptonom rayonluq siyasiy kéngesh chay ziyapiti ötküzgen bolup, buninggha Uyghur aptonom rayonluq kompartiye komitéti, hökümet, ishlepchiqirish qurulush armiyisi, Uyghur élide turushluq xitay azadliq armiyisi, soda-sana'etchiler we her qaysi sahelerning bir qisim wekilliri ishtirak qilghan.

Xitay kompartiyisi merkiziy komitéti siyasiy byurosining ezasi, aptonom rayonluq partkom sékritari wang léchüen mexsus tebrik sözi sözlep, Uyghur aptonom rayonining ötken bir yilliq her sahediki xizmetliri we utuqlirigha yuqiri baha bérish bilen birge partiye merkiziy komitétigha wakaliten her sahedin, bolupmu azadliq armiye, qoralliq saqchi qisimliri hem ishlepchiqirish qurulushi armiyisidin alahide hal soraydighanliqi we ulargha salam yollaydighanliqini izhar qilghan.

Shinxu'a agéntliqining bu heqtiki xewiride körsitilishiche, wang léchüenning sözide yene milliy ittipaqliq we muqimliq mesilisi alahide orunni igiligen bolup, u sözide " biz merkezning shinjangning muqimliqini qoghdashqa a'it chiqarghan bir qatar zor siyasetlirini téximu chongqur halda emeliyleshtürüshimiz lazim. Bayriqimiz roshen halda milliy bölgünchilik we qanunsiz diniy pa'aliyetlerge qarshi turup, ijtima'iy we siyasiy amanliqni qet'iy tewrenmey qoghdishimiz kérek" dep tekitligen.

Bu yighin'gha 28 - dékabir küni aptonom rayonning re'islik wezipisidin qalduriwétilgen isma'il tiliwaldiningmu qatnashqanliqi melum. Biraq, uning hazir Uyghur rayonida héchqandaq rehbiriy salahiyiti yoq bolup, uning orni qosh tilliq ma'arip nami astida Uyghur ma'aripi we tilini yoqitishning we Uyghur siyasiy heriketlirige zerbe bérishning bayraqdari dep teriplinip kéliwatqan 46 yashliq nur bekri igiligen idi. Isma'il tiliwaldining wezipe ötesh mudditi toshmay turup, tuyuqsiz wezipisidin qalduriwétilishi Uyghurlar arisida türlük inkaslarni qozghimaqta. (Ümidwar)

Pikirler (0)
Share
Toluq bet