Wang léchüen memliket ichi we sirtidiki "üch xil küch" ke qarshi yene seperwerlik élan qildi

2006-05-15
Élxet
Pikir
Share
Print

Dunya jama'etchiliki xitay hökümitini xelq'ara térrorluqqa qarshi küreshni bahane qilip, Uyghurlarning kishilik hoquqini depsende qiliwatidu, dep eyiblewatqan bir chaghda, Uyghur aptonom rayoni partkomining sékrétari wang léchüen rayondiki jama'et xewpsizlik da'irilirini memliket ichi we sirtidiki "üch xil küchler" ge zerbe bérish we ulargha qarshi mudapi'e tedbirini kücheytish toghrisida yene bir qétim agahlandurdi.

14- May küni ürümchide chaqirilghan jama'et xewpsizlik idariliri mudirlirining yighinida jama'et xewpsizlik da'irilirini "jiddiy we segek bolush, krizis tuyghusini kücheytishke " chaqirghan wang léchüen, "memliket ichi we sirtidiki üch xil küchlerning herikitige qarshi mudapi'e körüshni kücheytish we zerbe bérish kérek " dédi.

Wang léchüenning eskertishiche, nöwette bölgünchilikke qarshi küresh weziyiti yenila ötkür bolup, u " biz hergiz biperwaliq qilmasliqimiz we boshashmasliqimiz kérek " deydu. Wang, jama'et xewpsizlik organlirini " bezi weqelerning arqisigha yoshurun'ghan heqiqi ehwallarni igileshke" chaqirghan bolsimu, lékin xitay metbu'atliri buning qaysi weqeler ikenlikini tilgha almidi.

Yighinda aptonom rayonning re'isi ismayil tiliwaldi, " shinjangda bölgünchilikke qarshi küreshning uzun - muddetlikliki we murekkeplikini chongqur tonush kérek " deydu. Siyasi qanun komitétining sékritari jang shyuming yighinda, jama'et xewpsizlik organlirini " asasiy qatlam qurulushini kücheytish " ke chaqirghan. Lékin amérika tashqi ishlar ministirliqi 2005 - yildiki kishilik hoquq doklatida, béyjing da'irilirini xitay köchmenlirini yölesh we Uyghurlarni iqtisadi, siyasi we ijtima'iy ishlarda chetke qéqish bilen eyiblidi. (Erkin)

Pikirler (0)
Share
Toluq bet