Рабийә қадирниң пәрзәнтлири үрүмчидә сақчилар тәрипидин сорақ қилинди

2006-04-07
Елхәт
Пикир
Share
Принт

Уйғур кишилик һоқуқи вә демократийә һәрикитиниң рәһбири рабийә қадирниң үрүмчидики пәрзәнтлири алдинқи күни хитай сақчилири тәрипидин нәнгүән сақчиханисиға елип берилип сорақ қилинди. Нәнгүән сақчиханиси қармиқидики рабийә қадир ишханиси, дәп атлидиған 317 - номурлуқ ишханиниң сақчилири пәйшәнбә күни рабийә қадирниң кичик оғли вә әқидә ширкитиниң мудири алим абдуреһимни нәнгүән сақчиханисиға елип берип бир йерим саәт сорақ қилған вә уни баҗ оғрилаш җинайити билән рәсмий "җинайәт гумандари" дәп әйибләйдиғанлиқини, адвукат тәклип қилса йол қоюдиғанлиқини уқтурған.

Лекин алим қадир сақчиларниң әйиблишини рәт қилиш билән биргә, уларниң баҗ оғрилиғанлиқини иқрар қилидиған бир һөҗҗәткә қол қоюш тәлипини рәт қилип, адвукат тәклип қилишни қобул қилмиди. У, сақчилар мени җинайәт гумандари, дәп бекитидиғанлиқини билдүргән болсиму, лекин рәсмий әйибнамисини көрсәтмиди яки мени қолға алмиди " дәйду. Униң әскәртишичә, икки нәпәр сақчи әтигәндин - кәчкичә униң арқисида йүрүйдикән вә ширкәт ишханисиға киришигә рухсәт қилмайдикән.

Алим абдуреһим, өткән йили 5 ‏- айда җамаәт хәвпсизлик назарити әқидә ширкитиниң барлиқ һөҗҗәт вә тохтамнамиларни елип чиқип кәткәндин кейин, ширкәтниң содиси пүтүнләй паләч әһвалға чүшүп қалди,дәп көрсәтти. У, " қолимиздики сақчи тәрәпниң әйиблишини ақлайдиған пүтүн һөҗҗәтләр мусадирә қилинди. Өзимизни ақлайдиған пакитлар җамаәт хәвпсизлик назаритиниң қолида " дәйду.

Уйғур аптоном райони парткоминиң секритари ваң лечүән өткән йили рабийә қадирни баҗ оғрилаш вә миллий бөлгүнчиләр билән тил бириктүрүш билән әйиблигән иди. Лекин рабийә қадирниң әскәртишичә,униң ширкити 1990 ‏- йилдин 1998 ‏- йилғичә 18 қетим аптоном район вә мәмликәт бойичә "баҗ тапшуруш байрақдари" болуп баһаланған.

Пикирләр (0)
Share
Толуқ бәт