Хитай һөкүмити уйғур ели вә тибәттики контроллуқини техиму күчәйтиши мумкин

30‏ - Авғуст күни америкида чиқидиған вашингтон почта гезитидә елан қилинған бир мақалидә, хитай һөкүмитиниң уйғур ели вә тибәткә қаратқан контроллуқини техиму күчәйтиши мумкинлики тәкитләнгән.
Мухбиримиз өмәр қанат хәвири
2008-08-30
Елхәт
Пикир
Share
Принт

 Җил дру тәрипидин елан қилинған мақалидә, " уйғур елидә олимпик һарписида бейҗиң һөкүмити тәрипидин елинған қаттиқ бихәтәрлик тәдбирлиригә қаримай, авғуст ейиниң ичидила хитай бихәтәрлик қисимлириға қарши 4 қетим һуҗум елип берилиши, хитай һөкүмитиниң йеқинқи бирнәччә ай ичидә тибәт вә уйғур елигә орунлаштурулған миңлиған һәрбий вә сақчи қисимлирини чекиндүрмәй бу районларда давамлиқ тутуп турушиға сәвәб болуши мумкин" дейилгән.

Хитай һөкүмитиниң тибәт вә уйғур елидики телефон вә интернет қатарлиқ алақилишиш қораллири үстидики контроллуқини давамлаштуруватқанлиқи әскәртилгән мақалидә, бейҗиң даирилири чәт дөләт рәһбәрлири шуниңдәк тибәт вә уйғур паалийәтчилириниң тибәтләр вә уйғурларниң хитай һөкүмитигә болған наразилиқлирини аңлаш вә уларниң шикайәтлири үстидә музакирә елип бериш тоғрисидики тәләплирини рәт қилип келиватқанлиқини әскәртилгән.

Хитай даирилириниң далай ламани ишәнгили болмайдиған адәм дәп тәнқид қилса, уйғур елидики вәқәләрни террорчиларниң иши дәп қараватқанлиқи тәкитләнгән мақалидә, авғуст ейи ичидә уйғур елидә елип берилған 4 һуҗумниң хитай сақчилири вә бихәтәрлик қисимлириға қаритилғанлиқи вә һуҗум қилғучиларниң пичақ вә өйдә ясалған бомба қатарлиқ наһайити аддий қораллар ишләткәнлики алаһидә тилға елинған.

Мақалисидә, дуня уйғур қурултийиниң баянатчиси дилшат ришитниң "хитай һөкүмитиниң бастуруш сияситиниң вәзийәтни техиму җиддийләштүрүветишидин әндишә қиливатимиз" дегән сөзлирини нәқил кәлтүргән аптур җил дру, мақалисини, хитай иҗтимаий пәнләр акадимийисиниң профессори ю җийәнроңниң " әгәр һөкүмәт шинҗаңни хитай территорийиси ичидә тутуп турушни халиса, уйғур мустәқилчилиригә қарши чоқум қаттиқ тәдбирләр қоллиниши керәк" дегән сөзлири билән аяғлаштурған.
 


Пикирләр (0)
Share
Толуқ бәт