Uyghur rayonidiki xéli bir qisim yéza-bazarlarda bu yil qurban héyt namizining oqulmighanliqi ashkarilandi

Muxbirimiz shöhret hoshur
2019-08-14
Élxet
Pikir
Share
Print
Uyghur diyaridiki munarliri bilen hilal ayliri chéqiwétilgen bir meschitning esli we hazirqi haliti.
Uyghur diyaridiki munarliri bilen hilal ayliri chéqiwétilgen bir meschitning esli we hazirqi haliti.
Social Media

Weziyettin xewerdar kishilerning bayan qilishiche, bu yil Uyghur rayonining köp sandiki yéza-bazarlirida qurban héyt namizi oqulmighan, buninggha bir tereptin kishilerdiki meschitke bérishtin qorqush seweb bolghan bolsa, yene bir tereptin meschitlerde imamliq qilghudek diniy zatlarning bolmasliqi seweb bolghaniken. Muxbirimizning yéza-bazarlargha qarita élip barghan téléfon ziyaretliri dawamida yuqiriqi uchurlarning toghriliqi qismen derijide delillendi. Töwende muxbirimiz shöhret hoquqning bu heqte teyyarlighan programmisi diqqitinglarda bolidu

Türkiyede yashawatqan we öz kimlikini ashkarilashni xalimighan bireylen, uruq-tughqan we dost-buraderliridin anglighanlirigha asasen, Uyghur rayonining köp sandiki yéza-bazarlirida bu yil qurban héyt namizining oqulmighanliqini melum qildi. Aqsu, qeshqer we xotenlerdin téléfonimizni qobul qilghan saqchi xadimlirimu, yuqiriqi uchurning toghriliqini ret qilmidi. Mezkur weziyettin xewerdar kishining bayan qilishiche, yéqinqi üch yilda lagérgha ekétilgenlerning mutleq köpinchisi meschitke barghan we yaki meschit sirtida namaz oqughanliqi üchün tutqun qilin'ghachqa, ahaliler bu héyt namizida meschitke bérishtin qorqqan. Asasiy qatlamdiki köpinche kadir we saqchilarmu héyt namizigha bérishke ruxset bar yaki yoqluqi heqqide éniq bir gep qilmighan. Aqsu güllük yéza saqchi xadimimu, bu yil héyt namizining oqulghan-oqulmighanliqi heqqidiki so'alimizgha jawab bérelmidi.

Weziyette xewerdar kishining bayan qilishiche da'iriler peqet xelq'ara jama'etning közini boyash üchünla sheher merkezliridiki bir qisim meschitlerde héyt namizi oqulushqa ruxset qilghan, emma jem'iyette bu meschitlerni toldurghudek derijide kishi bolmighachqa bir qisim yéza kadirliri, lagér sirtida qalghan az sandiki kishilerni héyt namizigha bérishqa we meschit aldida sama oynashqa righbetlendürgen hem teshkilligen. Lop bazarliq saqchi xadimi bu heqtiki so'alimizgha jawab bermidi. Saqchi xadimliri héytliq bixeterlik tedbirliri heqqide melumat bergen bolsimu, bu meschitke alaqidar tedbirlerni tilgha almidi. 

Weziyettin xewerdar kishining bayan qilishiche, bu qétim héyt namizigha adem barmasliqta, da'irilerning waqtida we éniq bir uqturush chiqarmighanliqi shundaqla ahalilerning xataliship qélishtin qorqush we lagérgha ekétilish endishisidin bashqa, köpinche mehellilerde diniy zatlarning qalmighanliqi we ularning mutleq köpinchisining türme yaki lagérgha solaqliq ikenliki seweb bolghan. 

Téléfonimizni qobul qilghan ili chapchaldiki bir kent kadiri, öz tewelikide diniy zatlarning qalmighanliqini delillidi. Ilgiri ziyaritimizni qobul qilghan qariqashning yawa yéza saqchi xadimi bu yézidiki diniy zatlarning 60% tining lagérda ikenlikini ashkarilighanidi. 

Shayar nahiyesidiki ahalilerdin biri bu yil héyt namizigha qatnashmighanliqini éytti؛ ema néme üchün qatnashmighanliqi heqqide gep qilalmidi. 
Aqsudiki yene bir saqchi xadimi, eger ahalilerdin bireri özidin meschitke bérish-barmasliq heqqide meslihet sorap qalsa, barmasliqni teshebbus qilidighanliqini bayan qilish arqiliq bu yilqi siyasiy hawada, héyt namizigha bérishning xataliq sanilidighanliqini delillidi.

Toluq bet