«Шинҗаң қизил төгә бйо-техника ширкити» ниң баш директори абдувәли абдусәмәт тутқунда

Мухбиримиз шөһрәт һошур
2019-11-06
Елхәт
Пикир
Share
Принт
«Шинҗаң қизил төгә бйо-техника чәклик ширкити» ниң баш директори абдувәли абдусәмәт әпәнди.
«Шинҗаң қизил төгә бйо-техника чәклик ширкити» ниң баш директори абдувәли абдусәмәт әпәнди.
Oqurmen teminligen

«Шинҗаң яшлири» Журнилиниң 2011‏-йиллиқ 5‏-санида көзгә көрүнгән миллий карханичи сүпитидә тонуштурулған «шинҗаң қизил төгә бйо-техника чәклик ширкити» ниң баш директори абдувәли абдусәмәтниң 2018‏-йили тутқун қилинғанлиқи вә һазирғичә из-дерики йоқлуқи ашкариланди. Мәлум болушичә, асаслиқи һалал йемәклик ишләпчиқириш вә сетиш билән шуғуллинидиған бу ширкәтниң 2011‏-йилдила уйғур райони бойичә 120 орунда топ сетиш, 10 миңдин артуқ орунда парчә сетиш нуқтиси бар икән. Нәччә миңлиған уйғурни иш билән тәминләп келиватқан бу баш директор икки қериндиши, йәни ширкәтниң икки ярдәмчи рәһбири абдукевир абдусәмәт вә абдусәми абдусәмәт билән бирликтә тутқун қилинған.

Өткән һәптә вәзийәттин хәвәрдар кишиләрдин бири радийомизға учур йоллап, «шинҗаң қизил төгә бйо-техника ширкити» ниң баш директори, 45 яшлиқ карханичи абдувәли абдусәмәтниң ширкәтни ярдәмлишип башқуруватқан икки қериндиши абдукевир абдусәмәт вә абдусәми абдусәмәт билән бирликтә 2018‏-йили тутқун қилинғанлиқини мәлум қилди. Дейилишичә, мәзкур ширкәтниң мәркизи ишханиси үрүмчидә, фабрикиси ақсуниң тоқсу наһийәсидә болуп, баш директор абдувәли абдусәмәт икки қериндиши билән тутуп кетилгәндин кейин из-дерәксиз ғайиб болған. Уларниң аилә-тавабиати вә ширкәт хадимлири уларниң ақивити һәққидә һечқандақ учур алалмиған.

Биз ширкәтниң хитайчә тор архиплирида сақлинип қалған алақә учурлириға асасән мәзкур ширкәтниң ишхана вә завутлириға телефон қилдуқ.

Бу телефонлар елинмиғандин кейин биз үрүмчи вә тоқсудики алақидар һөкүмәт органлириға телефон қилдуқ. Хадимлар мәзкур ширкәт вә униң әһвали һәққидә мәлумат берәлмиди. Биз карханичи абдувәли абдусәмәтниң юрти қәшқәр йеңишәһәрдики япчан сақчиханисиға телефон қилдуқ. Мәзкур сақчиханидики сақчи хадими абдувәли абдусәмәтниң қериндашлири билән бирликтә икки йил бурун тутулғанлиқини дәлиллиди, әмма бу хадим уларниң тутулуш сәвәби һәққидә мәлумат берәлмиди.

Вәзийәттин хәвәрдар кишиниң баян қилишичә, абдувәли абдусәмәтниң һалал йемәкликләр ишләпчиқиришини қанат яйдуруши вә мәһсулатлириниң сүпитини кәң‏ көләмдә тәшвиқ қилиши даириләр тәрипидин кишиләрни «диний радикаллиқ» қа йетәкләш дәп қаралған. Вәзийәттин хәвәрдар киши абдувәлиниң иниси абдусәминиң тоқсудики завуттин 50 чә ишчиси билән бирликтә тутуп кетилгәнликини, буниңға уларниң завутниң йиғин залида намаз оқуғанлиқиниң сәвәб болғанлиқини мәлум қилған иди. Телефонимизни қобул қилған тоқсу наһийә юлтузбағ йезисидики бир аманлиқ мудири абдусәми абдусәмәтниң завуттики бир түркүм ишчиларға бир җүмә намизида имамлиқ қилғанлиқи үчүн тутулғанлиқини ашкарилиди. Униң дейишичә, абдусәми абдусәмәт имамлиқ қилған шу җүмә намизиға қатнашқан шу кәнтиниң бир әзаси 7 йиллиқ кесилгән.


Вәзийәттин хәвәрдар кишиниң шикайәт қилишичә, карханичи абдувәли абдусәмәтниң нәтиҗилири, йәни униң миңларчә кишини иш билән тәминләштәк җәмийәткә қошқан төһписи вә 20-30 йилчә һөкүмәткә төлигән тиҗарәт баҗлири уни уйғур районида 3 йилдин буян давам қиливатқан аталмиш «террорлуқ» вә «диний әсәбийлик» кә қарши сиясий қуюндин қоғдап қалалмиған.

Пикирләр (0)
Share
Толуқ бәт