"Shinjang qizil töge byo-téxnika shirkiti" ning bash diréktori abduweli abdusemet tutqunda

Muxbirimiz shöhret hoshur
2019-11-06
Élxet
Pikir
Share
Print
"Shinjang qizil töge byo-téxnika cheklik shirkiti" ning bash diréktori abduweli abdusemet ependi.
"Shinjang qizil töge byo-téxnika cheklik shirkiti" ning bash diréktori abduweli abdusemet ependi.
Oqurmen teminligen

"Shinjang yashliri" zhurnilining 2011‏-yilliq 5‏-sanida közge körün'gen milliy karxanichi süpitide tonushturulghan "Shinjang qizil töge byo-téxnika cheklik shirkiti" ning bash diréktori abduweli abdusemetning 2018‏-yili tutqun qilin'ghanliqi we hazirghiche iz-dériki yoqluqi ashkarilandi. Melum bolushiche, asasliqi halal yémeklik ishlepchiqirish we sétish bilen shughullinidighan bu shirketning 2011‏-yildila Uyghur rayoni boyiche 120 orunda top sétish, 10 mingdin artuq orunda parche sétish nuqtisi bar iken. Nechche minglighan Uyghurni ish bilen teminlep kéliwatqan bu bash diréktor ikki qérindishi, yeni shirketning ikki yardemchi rehbiri abdukéwir abdusemet we abdusemi abdusemet bilen birlikte tutqun qilin'ghan.

Ötken hepte weziyettin xewerdar kishilerdin biri radiyomizgha uchur yollap, "Shinjang qizil töge byo-téxnika shirkiti" ning bash diréktori, 45 yashliq karxanichi abduweli abdusemetning shirketni yardemliship bashquruwatqan ikki qérindishi abdukéwir abdusemet we abdusemi abdusemet bilen birlikte 2018‏-yili tutqun qilin'ghanliqini melum qildi. Déyilishiche, mezkur shirketning merkizi ishxanisi ürümchide, fabrikisi aqsuning toqsu nahiyeside bolup, bash diréktor abduweli abdusemet ikki qérindishi bilen tutup kétilgendin kéyin iz-déreksiz ghayib bolghan. Ularning a'ile-tawabi'ati we shirket xadimliri ularning aqiwiti heqqide héchqandaq uchur alalmighan.

Biz shirketning xitayche tor arxiplirida saqlinip qalghan alaqe uchurlirigha asasen mezkur shirketning ishxana we zawutlirigha téléfon qilduq.

Bu téléfonlar élinmighandin kéyin biz ürümchi we toqsudiki alaqidar hökümet organlirigha téléfon qilduq. Xadimlar mezkur shirket we uning ehwali heqqide melumat bérelmidi. Biz karxanichi abduweli abdusemetning yurti qeshqer yéngisheherdiki yapchan saqchixanisigha téléfon qilduq. Mezkur saqchixanidiki saqchi xadimi abduweli abdusemetning qérindashliri bilen birlikte ikki yil burun tutulghanliqini delillidi, emma bu xadim ularning tutulush sewebi heqqide melumat bérelmidi.

Weziyettin xewerdar kishining bayan qilishiche, abduweli abdusemetning halal yémeklikler ishlepchiqirishini qanat yaydurushi we mehsulatlirining süpitini keng‏ kölemde teshwiq qilishi da'iriler teripidin kishilerni "Diniy radikalliq" qa yéteklesh dep qaralghan. Weziyettin xewerdar kishi abduwelining inisi abdusemining toqsudiki zawuttin 50 che ishchisi bilen birlikte tutup kétilgenlikini, buninggha ularning zawutning yighin zalida namaz oqughanliqining seweb bolghanliqini melum qilghan idi. Téléfonimizni qobul qilghan toqsu nahiye yultuzbagh yézisidiki bir amanliq mudiri abdusemi abdusemetning zawuttiki bir türküm ishchilargha bir jüme namizida imamliq qilghanliqi üchün tutulghanliqini ashkarilidi. Uning déyishiche, abdusemi abdusemet imamliq qilghan shu jüme namizigha qatnashqan shu kentining bir ezasi 7 yilliq késilgen.


Weziyettin xewerdar kishining shikayet qilishiche, karxanichi abduweli abdusemetning netijiliri, yeni uning minglarche kishini ish bilen teminleshtek jem'iyetke qoshqan töhpisi we 20-30 yilche hökümetke töligen tijaret bajliri uni Uyghur rayonida 3 yildin buyan dawam qiliwatqan atalmish "Térrorluq" we "Diniy esebiylik" ke qarshi siyasiy quyundin qoghdap qalalmighan.

Toluq bet