Chaqiliqta mehkum nebi ghoja'exmetning teblighini anglighan 82 kishining késilip ketkenliki ashkarilandi

Muxbirimiz shöhret hoshur
2019-12-16
Élxet
Pikir
Share
Print

Xitayning lagérlar heqqidiki mexpiy höjjetliri qatarida ashkarilan'ghan chaqiliq nahiyesige a'it bir sot hökümi heqqide élip barghan éniqlashlirimiz dawamida mehkum nebi ghoja'exmetke chétilip, jem'iy 82 kishining késilip ketkenliki ashkarilandi. Melum bolushiche, nebi ghoja'exmetning "Shehwaniy filim" lerni körmeslik toghrisidiki exlaq terbiyesini anglighanliqi üchün "Topliship jem'iyet tertipini buzush" we "Döletni parchilashqa urunush" jinayiti bilen eyiblen'gen bu mehkumlar aldi 10 yil, arqisi 5 yil 6 ayliqtin késilgen.

Mexpiy höjjetler qatarida ashkarilan'ghan mezkur sot hökümnamiside mehkumning "Topliship jem'iyet tertipini buzush" bilenmu eyiblen'genliki bayan qilin'ghan. Shunga biz chaqiliq nahiyelik sot mehkimisining melum bir bölüm bashliqi bilen ötküzgen söhbitimiz dawamida mehkum nebi ghoja'exmetning délosigha kimlerning chétilghanliqi we ularning aqiwiti heqqide melumat soriduq. Mezkur xadim déloning sot hökümide déyilgendek, 315-dölet tashyoli boyidiki bir shéghil zawutida yüz bergenliki, yeni mehkum nebi ghoja'exmetning shu shéghil zawutida chédirda yétip-qopup ishlewatqan ishchilargha atalmish qanunsiz tebligh qilghanliqini delillesh bilen birlikte uning délosigha chétilip 100 ge yéqin kishining tutqun qilin'ghanliqini bayan qildi.

Sot hökümide mehkumning eslide qaraqash nahiye bazar ichige nopusluq ikenliki qeyt qilin'ghan. Qaraqash bazar ichidiki bir kent saqchisi chaqiliqta nebi ghoja'exmet délosigha chétilip késilgenlerning mutleq köpinchisining öz kentidin ikenliki we sanining 82 neper ikenlikini ashkarilidi. Arilirida ikki neper ayalmu bar bolghan, 18 yash bilen 60 yash arisidiki 82 kishining "Qanunsiz tebligh anglash" we "Döletni parchilashqa urunush" bilen eyiblinip aldining 10 yil, arqisining 5 yil 6 ayliq késilgenlikini tilgha aldi.

Biz chaqiliqtiki sot xadimidin mezkur hökümname xelq'aragha ashkarilan'ghandin kéyin mezkur sot mehkimisi ichide mes'uliyet sürüshte qilish ehwalining yüz bergen yaki bermigenliki heqqidimu melumat soriduq. U bu jehette pikir bayan qilishni xalimaydighanliqini bildürdi.

Ilgiriki éniqlashlirimizdin melum bolushiche, atalmish "Qanunsiz tebligh" ni anglighanliqi üchün tutulush we késilish qismitige duch kelgenler yalghuz chaqiliq nahiyesi bilenla cheklenmeydiken. Ghulja nahiyesidiki bir terbiyelesh merkizige qarita élip barghan téléfon ziyaritimiz dawamida mezkur lagérda yétiwatqan bir tutqun özining 10 yil burun mehellisidiki bir toyda tebligh anglap qalghanliqi üchün lagérgha solan'ghanliqini pash qilghan idi.

Biz chaqiliqtiki sot xadimidin qurulushta ishlewétip tebligh anglighanliqi üchün késiwétilgen bu 82 kishining nöwette nede ikenliki we ularning a'ilisige kimler qarawatqanliqi heqqide so'al sorunimizda u so'alimizning chektin ashqanliqini bildürüp, bu heqtimu jawab bérishni ret qildi.

Toluq bet