Челишчи қастәр полат қазақситанлиқ нахшичиниң нахшисини «тик-ток» қа чиқарғанлиқи үчүн 15 йиллиқ кесиветилгән

Мухбиримиз шөһрәт һошур
2020-10-30
Елхәт
Пикир
Share
Принт
Қазақистанлиқ нахшичиниң нахшисини «тик-ток» қа чиқарғанлиқи үчүн 15 йиллиқ кесиветилгән челишчи қастәр полат. (Вақти вә орни ениқ әмәс)
Қазақистанлиқ нахшичиниң нахшисини «тик-ток» қа чиқарғанлиқи үчүн 15 йиллиқ кесиветилгән челишчи қастәр полат. (Вақти вә орни ениқ әмәс)
RFA/Shöhret Hoshur

Инкас қилинишичә, чөчәк вилайитиниң чағантоқай наһийәсидики яш челишчи қастәр полат қазақистанлиқ нахшичи дидар қамийевниң бир нахшисини иҗтимаий таратқулардин «тик-ток» қа чиқарғанлиқи үчүн, өткән йили 7-айда тутқун қилинған. Мәлум болушичә, мәзкур нахшиниң мәзмунидики өрп-адәткә варислиқ қилиш тәшәббуси «диний радикаллиқниң тәшвиқати» дәп қарилип, 20 яшлиқ челишчи қәстәр полат 15 йиллиқ кесиветилгән.

Қазақистандики лагер шаһити бақиталиниң радийомизға инкас қилишичә, қәстәр полат қазақистандики сәнәткар дидар қамийевниң нахшисини «тик-ток» қа чиқирип достлири билән ортақлашқанлиқи үчүн өткән йили 7-айда тутқун қилинған вә ‏8-айда 15 йиллиқ кесиветилгән. Униңдин сирт униңға йәнә 30 миң йүән җәриманә қоюлған.

Мәлум болушичә, бу йил 20 яшқа киргән қәстәр полатчағантоқай наһийәсиниң қариғай йезисидин болуп, у өткән 3 йилда чөчәк бойичә челишиш мусабиқилиридә арқа-арқидин биринчиликкә еришкән. Бақитали тәминлигән қастәр полатниң тутқун қилинғанлиқи һәққидә җ х тармақлири тәрипидин аилисигә берилгән уқтурушта униң «диний әсәбийлик» ни тәшвиқ қилиш гумани билән чағантоқай қамақханисида тутуп турулуватқанлиқи қәйт қилинған.

Тарбағатайдики алақидар хадимлар қастәр полат делоси һәққидә мәлумат бериштин өзлирини қачурди. Бир сот хадими қастәр полат делоси һәққидә дөләт аманлиқ сақчилирини издишимизни тәвсийә қилса, дөләт аманлиқ сақчилири бу дело һәққидә мәлумат беришни рәт қилди. Бақиталиниң дейишичә, бу йил 20 яшларға киргән қастәр полатниң илгири һечқандақ җинайәт тарихи вә яки гуманлиқ иш-һәркәтлири болуп баққан әмәскән. Бақитали қастәр полатниң чағантоқайниң қариғай йезисидики азарқан исимлик сақчи тәрипидин тутқун қилинғанлиқини мәлум қилған иди. Мәзкур сақчи, йәни азарқан телефонимизни қобул қилған чеғида өз тәвәликидә өзи тутқун қилған қастәр полат исимлик бир кишиниң болғанлиқини дәлиллиди. Әмма у қастәр полат садир қилған дело вә униң үстидики кесим һәққидә соал сориғинимизда телефонни қоювәтти.

Тордики материялларда көрситилишичә, дидар қамийев қазақистандила әмәс, бәлки түрк дунясида тонулған сәнәткарлардин болуп, у «‏үчинчи қетимлиқ хәлқара түрк нахша фестивали» қатарлиқ бир қатар катта сәнәт мурасимлириға қатнашқан икән.

Нөвәттә америкада яшаватқан, илгири уйғур районида бир мәһәл қазақ аһалилири арисида яшиған вә «шиинҗаң гезити» ниң қазақчә бөлүмидиму бир мәзгил хизмәт қилған сабиқ мухбир җүрәт низамидин мәзкур нахшиниң қисмән текистини уйғурчилаштурди.

Җүрәт низамидинниң дейишичә, мәзкур нахшиниң әслидә хитай тәрәпкә тегидиған һечқандақ бир тәрипи йоқ болуп, нахшида пәқәт қазақ җәмийитигә қарита иман-етиқадлиқ вә әдәп-әхлақлиқ болуш чақириқи сунулған вә миллий өрп-адәткә қарши қилмишлар тәнқид қилинған. Әмма хитай даирилири нөвәттики аталмиш «диний әсәбийлик» кә қарши күрәш долқунида йәрлик хәлқләрниң диний етиқадлиқ болуши вә миллий өрп-адәтлиригә варислиқ қилишини өзлириниң дөләт бихәтәрликигә тәһдит дәп ашкара елан қилғанлиқи үчүн, қастәр полатниң мәзкур нахшини торға чиқириши «җинайәт» дәп қаралған.

Юқирида қазақ яш челишчи қастәр полатниң қазақистанлиқ нахшичи дидар қамийевниң нахшисини «тик-ток» қа чиқарғанлиқи үчүн 15 йиллиқ кесилгәнлики һәққидә мәлумат бәрдуқ.

Пикирләр (0)
Share
Толуқ бәт