Лоптики «қанунсиз китаб» делосида қанат астиға алғучиниң 7 йил, елинғучиниң 4 йил кесилгәнлики дәлилләнди

Мухбиримиз шөһрәт һошур
2020-01-24
Елхәт
Пикир
Share
Принт
Уйғур диярида «қанунсиз диний буюмлар» намида йиғивелинған «қуран кәрим» вә диний китаблар.
Уйғур диярида «қанунсиз диний буюмлар» намида йиғивелинған «қуран кәрим» вә диний китаблар.
Social Media

Алдинқи күни радийомизда лоп наһийәсидә йүз бәргән аталмиш «қанунсиз китаб» делосида сампул йезисиниң башилиқи билән бирликсәп кадириниң «җинайәтчини қанат астиға елиш» билән әйиблинип 7 йиллиқтин кесилгәнлики хәвәр қилинған иди. Муһаҗирәттики лоплуқлардин бири радийомизға учур йоллап, әнә шу делода аталмиш «қанат астиға елинғучи» ниң сампулниң кәләнтә кәнтидики тохти рози дегән киши икәнликини мәлум қилди. Мухбиримизниң бу һәқтә йәниму илгириләп елип барған ениқлашлири давамида тохти розиниң шу делода «қанунсиз китаб сақлаш» билән әйиблинип оғли билән бирликтә 4 йиллиқтин кесилгәнлики вә нөвәттә җаза муддитини түгитип болғанлиқи ашкариланди.

Һөрмәтлик радийо аңлиғучилар, 2015 ‏-йили лоп наһийәси сампул йезисиниң башлиқи абликим мәттурсун билән бирликсәп кадири мәтезиз мәттохтиниң 7 йиллиқ кесилишигә сәвәп болған аталмиш «җинайәтчини қанат астиға елиш делоси» да «қанат астиға елинғучи» ниң ким икәнликини айдиңлаштуруш үчүн лоптики алақидар органларға қайтидин телефон қилдуқ. 

Лоплуқ муһаҗир радийомизға учур йоллап, китаб сақлиғучиниң тохти рози дегән киши икәнлики вә сампулниң кәләнтә кәнтидә олтурушлуқ икәнликини мәлум қилғандин кейин биз сампул йезилиқ сақчиханиға телефон қилдуқ. Телефонимизни қобул қилған хадим тохти розиниң сампулниң кәләнтә кәнтидин икәнликини дәлиллиди. Йәнә бир хадим тохти розиниң оғли билән бирликтә наһийә базирида бир китаб дукини барлиқи, бу дуканда диний китаблар билән бирликтә бир қисим һәҗ сәпиригә алақидар буюм вә материяллар сетилидиғанлиқини мәлум қилди.

Алдинқи күни сампул йезисиниң башлиқи билән бирликсәп кадириниң «җинайәтчини қанат астиға елиш» билән кесилгәнликини ашкарилиған лоптики бир сиясий-қанун кадири у иккиси аталмиш «қанат астиға алған» кишиниң исми тохти рози икәнлики вә мәзкур делода «қанунсиз китаб сақлаш» билән әйиблинип оғли билән бирликтә 4 йиллиқтин кесилгәнликини дәлиллиди. Бу хадимниң баянлиридин мәлум болушичә, бу иккисиму мәзкур икки кадир билән бирликтә җаза муддитини керийә түрмисидә өтигән. Әмма җаза муддити улардин йерим һәссә аз болғачқа, җаза муддитини тамамлап қоюп берилгән. 

Һөрмәтлик радийо аңлиғучилар, илгири хотәнниң илчи йезисидин әһвал игилишимиз давамида бу йезида әң еғир кесилгән кишиниң абдуҗелил исимлик бир кәнт башлиқи икәнлики, униң йәр асти мәктәб ачқан бир диний затни сақчиға мәлум қилмиғанлиқи үчүн 17 йиллиқ кесилгәнлики, йәр асти мәктәп ачқан аталмиш җинайәтчиниң болса 4 йиллиқ кесилгәнлики мәлум болған иди. 

Шу чағда зияритимизни қобул қилған дуня уйғур қурултийиниң тәшвиқат ишлири мәсули пәрһат йоруңқаш әпәнди хитай даирилириниң аталмиш «қанат астиға алғучи» ни «қанат астиға елинғучи» дин нәччә һәссә артуқ җазалаш арқилиқ уйғурлар арисида өзара меһри-муһәббәтни йоқ қилишқа, буниң орниға өзар өч-адавәт пәйда қилишқа уруниватқанлиқини илгири сүргән иди.

Пикирләр (0)
Share
Толуқ бәт