Abduweli ayupning akisi erkin ayupning tutqunda ikenliki delillendi

Muxbirimiz shöhret hoshur
2019-11-22
Élxet
Pikir
Share
Print
Uyghur ziyaliysi we pa'aliyetchi abduweli ayupning 2017-yilining aldinqi yérimida tutup kétilgen akisi erkin ayup.
Uyghur ziyaliysi we pa'aliyetchi abduweli ayupning 2017-yilining aldinqi yérimida tutup kétilgen akisi erkin ayup.
Photo: RFA

Melum bolushiche, xitayning Uyghur rayonida qurghan yighiwélish lagérlirigha eng bashta solan'ghanlar qatarida muhajirettiki Uyghur pa'aliyetchilirining a'ile-tawabi'atlirimu mewjuttur. Jem'iyet xewerliride tekitlinishiche, hazir norwégiyede yashawatqan Uyghur ziyaliysi we pa'aliyetchi abduweli ayupning akisi erkin ayup we singlisi sajidigül ayup 2017‏-yilning aldinqi yérimida tutup kétilgen. Muxbirimizning erkin ayupning ish orni bolghan qeshqer konasheher (toqquzaq) nahiyelik partkomgha qarita élip barghan téléfon ziyaretliri dawamida uning 3 yildin buyan tutqunda ikenliki we nöwette qeshqer ayrrodom etrapidiki bir lagérda ikenliki delillendi

Igilishimizche, 1987-yili shinjang oniwérsitétining jughrapiye fakultitini püttürgen erkin ayup yurti toqquzaqqa kélip xizmetke chüshken. Xéli bir mezgil dölet xizmetchisi bolup ishligendin kéiyin tashmiliq yéziliq partkomning sékritarliqigha östürülgen erkin ayup2017 -yili toqquzaq nahiyelik partkom teshkilat bölümi réwiziye ishxanisining mudiri bolup wezipe ötewatqan mezgilde tutup kétilgen. 

Téléfonimizni qobul qilghan toqquzaq nahiyelik partkom teshkilat bölümining bir xadimi erkin ayup isimlik birsini tonimaydighanliqini bayan qildi. Biz uningdin bu shxanidin lagérgha ekitilgen kishining kim ikenlikini sorighinimizda u bu heqte özining jawap bérish mejburiyitining yoqluqini bbildürüp téléfonni qoyiwetti.

Teshkilat bölümining yene bir xadimi nahiyelik partkom ishchi-xizmetchiliridin lagérgha ekitilgenlerdin 4 kishini tonuydighanliqini bildürüp, bulardin2 nepirining isimini tilgha aldi. Biz uningdin partkom kadirliridin tutulghanlar ichide erkin ayup isimlik birsining bar-yoqluqini sorighinimizda, u "Elwette bar" dep jawap berdi. Biz uningdin erkin ayupning tutulush sewebini sorighinizmida u özining bu tür délolarda wezipe ötümigenlikini bayan qilip, bu heqte melumat yoqluqini éytti. Biz uningdin erkin ayupning qaysiy lagérda ikenlikini sorighinimizda u özining bu heqte melumati yoqluqini tekitlep, bu ehwalni délodin xewerdar bölüm bashliqidin sorishimizni tewsiye qildi. Emma tewsiye qilin'ghan xadim erkin ayupning ismini tilgha élishimiz bilen teng qiliwatqan sözini toxtatti. 

Toqquzaq nahiyelik partkom qoghdash bölümining bir xadimi özining partkomdin lagérgha ekitilgenlerni tekshürüsh we soraq qilish jeryanining bir qismigha yardemlishidighanliqini bildürdi. Emma u amanliq xadimlirining xitay tili ajizliqi seweblik soraqni xatirileshke qatnashmaydighaliqi, shunga ularning tutulush seweblirini esliyelmeydighanliqini bayan qildi. Mezkur partkomda 200 che ishche-xizmetchi barliqi, buning yérimigha yéqinining Uyghurlar ikenlikini tilgha alghan bu xadim özining bulardin lagérgha ekitilgenlerdin 5 kishini tonuydighanliqini bildürdi we tonuydighanliri qatarida erkin ayupningmu ismini tilgha aldi. U erkin ayupning tutulghinigha 3 yilche bolghanliqini bayan qilish arqiliq uning2017 ‏-yili5 ‏-ayda tutulghanliqi heqqidiki jem'iyet uchurining toghriliqini delillidi. 

Erkin ayupning nöwette norwégiyede yashawatqan inisi, tonulghan pa'aliyetchi abduweli ayup akisining bir qisim ehwali heqqide bir qisim melumatlarni berdi. 

Hörmetlik radiyo anglighuchilar, yuqiriqi uchurlardin pa'aliyetchi abduweli ayupning akisi erkin ayupning qeshqer ayrodrom etrapidiki bir lagérda tutqunda ikenliki delillendi, emma singlisi sajidigül ayupning éniq ehwali téxiche melum emes.

Toluq bet