Хотән педагогика алий техникоминиң 50 кә йеқин оқутқучисиниң тутулғанлиқи ашкариланди

Мухбиримиз шөһрәт һошур
2019-12-13
Елхәт
Пикир
Share
Принт
Муһаҗирәттики тәтқиқатчи абдувәли аюп тәрипидин тәйярланған «тутқундики зиялийлар тизимлики» дики бир қисим зиялилар.
Муһаҗирәттики тәтқиқатчи абдувәли аюп тәрипидин тәйярланған «тутқундики зиялийлар тизимлики» дики бир қисим зиялилар.
Sintash Media (Behram Sintash)

Мухбиримизниң хотәнгә қарита елип барған телефон зиярәтлири давамида 500 әтрапида ишчи-хизмәтчиси болған хотән педагогика алий техникоминиң 50 кә йеқин оқутқучи вә мәмурий хадимлириниң тутқунда икәнлики, буларниң ичидә йеши 70 тин ашқан пенсийонерларниңму барлиқи ашкариланди. Мәлум болушичә, мәзкур мәктәпниң ишчи-хизмәтчилириниң йеримдин көпрәки уйғур болуп, тутулғанлар мәзкур мәктәптики пүткүл уйғур оқутқучилар қошуниниң 15 пирсәнтигә йетидикән.

Һөрмәтлик радийо аңлиғучилар, өткән айларда торларда тарқалған вә үрүмчидики мәлум бир ониверситетниң сиясий өгиниш йиғининиң нәқ мәйдан хатириси икәнлики илгири сүрүлгән бир аваз хатирисидә маарип саһәсидин көп санда уйғур оқутқучиларниң тутқунда икәнлики ашкариланған иди. 

Биз өткән һәптә хотән педагогика алий техникоминиң икки мудириниң тутқунда икәнлики ениқлап болғандин кейин, тутқундики оқутқучиларниң омумий сани вә әһвали һәққидиму ениқлаш елип бәрдуқ. Мәзкур мәктәп хадими тәминлигән алақә учурлириға асасән хотәндики маарип саһәсигә мәсул бир сабиқ сиясий қанун кадиридин тутқундики икки мудирдин башқа йәнә кимләрниң тутқунда икәнликини соридуқ. 

У шаир мухтәр сүпүргә вә әнвәр һошур қатарлиқ 50 йеқин оқутқучи вә мәмурий хадимниң нөвәттә керийә түрмисидә икәнликини ашкарилиди. 16 ‏-Ноябир хәлқараға ашкариланған хитайниң лагерлар һәққидики мәхпий һөҗҗәтлиридә лагерға адәм тутушта яш чәклимиси йоқлиқи ениқ баян қилинған иди. 

Өткән йили қәшқәр уйғур нәшириятидин 30 пирсәнт ишчи-хизмәтчиниң тутқунда икәнлики ашкариланғандиму буларниң ичидә йеши 70тин һалқиған илгирики 3 нәпәр сабиқ нәширият башлиқиниң барлиқи мәлум болған иди. Хотән педагогика алий техникомидин тутқун қилинғанлар арисидиму пенсийонерлардин аз дегәндә 5 нәпири барлиқи, буларниң илгири юқури дәриҗилик мәмури хизмәтләр өтигәнлики, улардин бәзилириниң нөвәттә саламәтликиниң начар әһвалда икәнлики ашкариланди. 

Муһаҗирәттики паалийәтчи вә тәтқиқатчи абдувәли аюп тәрипидин тәйярланған «тутқундики зиялийлар тизимлики» дә муавин мудири барат турсунбақидин башқа профессор өмәрҗан нури вә оқуғучилар башқармисиниң башлиқи җүрәт дөләтләрниңму исимлири орун алған. Мәзкур сиясий-қанун кадири җүрәт дөләтниңму тутқундикиләр арсида барлиқини дәлиллиди. 

Һөрмәтлик радийо аңлиғучилар, биз өткән һәптә мәзкур мәктәпниң икки мудириниң керийә түрмисидә икәнликини хәвәр қилғандин кейин вәзийәттин хәвәрдар кишиләр радийомизға учур йоллап, керийә түрмисиниң хотәнгә қаримайдиғанлиқи вә аптонум раюн тәрипидин биваситә башқурулидиғанлиқини мәлум қилған иди. Мәзкур сабиқ сиясий-қанун кадириму хотән педагогика алий техникоми бивастә маарип назаритигә қариғанлиқи үчүн тутқунларниң хотәндики сақчи органлири тәрипидин әмәс, бәлки аптонум райондки дөләт аманлиқ сақчилири тәрипидин тутуп тәкшүрүлгәнликини мәлум қилди.

Пикирләр (0)
Share
Толуқ бәт