Уйғур диярида киноханилар ечилди, лекин ичи қупқуруқ дейәрлик

Мухбиримиз әркин
2020-03-26
Елхәт
Пикир
Share
Принт
Deadline.com Да елан қилинған «җуңго коронавирус саниниң азийишиға әгишип , 500+ киноханини қайтидин ачти» намлиқ мақалисидин елинған. 2020-Йили 23-март.
Deadline.com Да елан қилинған «җуңго коронавирус саниниң азийишиға әгишип , 500+ киноханини қайтидин ачти» намлиқ мақалисидин елинған. 2020-Йили 23-март.
deadline.com

Уйғур аптоном райони даирилири 16-марттин башлап корона вируси юқуми сәвәблик тақалған райондики бир қисим киноханиларни қайта ечишқа башлиғаниди. Мәлум болушичә, нөвәттә райондики һөкүмәткә қарашлиқ мутләқ көп қисим киноханилар буйруқ билән қайта ечилип болған. Лекин шәхсий киноханиларниң әһвали мәлум әмәс.

Буниңда диққәт қозғайдиған нуқта шуки, бу қетимқи юқумда әң бурун ечилған шундақла вә әң көп ечилған киноханилар йәнила уйғур аптоном районида. Хитайдики «күндилик бихәтәрлик» намлиқ малийә хәвәрләр ториниң билдүрүшичә, үрүмчидики «җоңйиң алтун палма» хитайдики әң бурун ечилған кинохана икән.

Өткән һәптә хитай миқясида җәмий 495 кинохана ечилған. Лекин буниң 23 %’ни уйғур аптоном районидики киноханилар тәшкил қилидикән. Биз 25-март күни үрүмчидики «хәлқ киноханиси» ға телефон қилип, мәзкур киноханиниң бир мәсул хадими билән сөзләштуқ. Униң билдүрүшичә, райондики киноханилар қайта ечилған болсиму, лекин киноханилар қупқуруқ дейәрлик икән.

Кинохана хадими: ««саәт 10 йеримдә қойидиған киномиз ‹қатиллиқ' дегән кино. Лекин тамашибин көп әмәс. 10 Нәччә адәм көридиғу, дәймән. Чүнки, һәммиси кона кино. Биз киноханини дезинфексийә қилимиз. Тамашибинларниң маска тақап кириши тәләп қилиниду. Киноханида тамашибинлар айрим-айрим олтуриду. Биргә олтурушқа болмайду. Пүтүн бир күн қанчә адәм көргәнликини билмәймән. Биз пүтүн бир күн 11-12 дәк кино қойдуқ. Биз юқириниң уқтуруши билән кино қойдуқ. Мәдәнийәт турмуши болмисиму болмайдиғу. юқириниң уқтурушида бизниң ишқа чүшүшимиз тәләп қилинди. Қойидиған йеңи кино болмисиму, тәләп бойичә кона киноларни қоюп турдуқ».

У бунчилик аз тамашибин билән иқтисади зиянни қандақ толдуридиғанлиқи һәққидики соалимизға, : «бизниң амалимиз йоқ, бәлким юқири зийинимизни төләп бериши мумкин. Үрүмчиниң мәдәнийәт турмуши тохтап қалса болмайду, дегән йолйоруқ билән кино қоюшни башлидуқ. Улар шундақ қилишимизни тәләп қилди. Һазир үрүмчидики җиддий һаләт 4-дәриҗигә чүшүрүлди. Һазир пүтүн пуқраларниң кочида масқа тақиши тәләп қилиниду. Кочиға чиқсиңиз һәммә йәрдә сақчи вә иҗтимаий район хадимлирини көрисиз. Улар кишиләрниң маскисини тәкшүриду. Маска тақимиғанларниң кимлики тәкшүрүлүп дәрһал бир тәрәп қилиниду. Шуңа һәммә адәм маска билән йүрүватиду» деди.

Биз йәнә үрүмчи «хәлқ тиятири» вә «1-май» киноханилириға телефон қилдуқ. Уларму киноханиларниң ечилғанлиқи, лекин түзүк тамашибин йоқлуқини билдүрди.

«Хәлқ тиятири» ниң нөвәтчи хадиминиң билдүрүшичә, «хәлқ тиятири» ечилған болсиму, лекин кино қоюлуп бақмиған. У филим ширкитиниң өзлириғу техи кино филими әвәтип бәрмигәнликини билдүрүп, шуңа кино қоялмайватқанлиқи, қачан кино филими кәлсә биләт сетишни башлайдиғанлиқини тәкитлиди. Униң билдүрүшичә, улар аптоном районлуқ филим ширкитигә қарашлиқ болуп, уларға кино филими әвәтсә қоялайдикән. У, бәзи киноханиларниң өзиниң кино филими барлиқи, уларниң өз алдиға кино қоялайдиғанлиқини билдүрди.

Уйғур аптоном райони вухәндә партлиған корона вируси юқумида хитайдики башқа өлкә-шәһәрләргә қариғанда әң ахирида карантин тәдбири алған шундақла карантин тәдбирлирини әң балдур бикар қилған райондур. Бу җәрянда йәрлик даириләрниң юқумға даир учурларни қаттиқ контрол қилиши, мутәхәссисләр чәтәлдики уйғурлар вә кишилик һоқуқ тәшкилатлирини әндишигә салған.

Улар карантин тәдбирлириниң ачарчилиқ пәйда қилиши шундақла юқумниң лагерларға тарқилиши еғир ақивәтләрни кәлтүрүп чиқиридиғанлиқини илгири сүрүп, хәлқараниң лагерларда тәкшүрүш елип беришиға йол қоюлушини тәләп қилип кәлгәниди.

Америка коломбийә университетиниң теббий пәнләр тәтқиқатчиси доктор муһәммәт имин әпәндиниң билдүрүшичә, хитайниң кинохана қатарлиқ аммиви көңүл ечиш орунлирини ечиветиши зор тәвәккүлчилик икән. У, буниң яшанғанларға зор йошурун хәвп пәйда қилидиғанлиқини билдүрди.

Лекин доктор муһәммәт иминниң илгири сүрүшичә, нөвәттә юқумни контрол қилишниң вақти өтүп кәткән. Шуңа дөләтләр асаслиқ күчини юқумни контрол қилишқа әмәс, өлүмни азайтишқа қаратмақтикән. У, хитайниң аммиви көңүл ечиш сорунлирини ечиветиштә тиббиий амилни әмәс, сиясий амилни көздә тутқанлиқи, униң пуқраларда бир хил бихәтәрлик туйғуси яритишқа тиришиватқанлиқини билдүрди.

Хитай дунядики әң чоң кино базири. Хитай киночилиқи йеқинқи 10 йилда изчил раваҗлинип, 2019-йили униң бу саһәдики кирими 64 милярд 300 милйон йүәнгә йетип барған. Униң бу саһәдики кирими йеқинқи 10 йилда 10 һәссә артқаниди. Лекин, хитай киночилиқ базири бу қетим вухәндә партлиған корона вируси юқумида қаттиқ зәрбә йегән. Корона вируси сәвәблик бу йил 24-январ күни йәни хитайниң чаған байрими һарписида хитайдики барлиқ киноханилар бирдәк тақалғаниди.

«Җәнубий хитай сәһәр почтиси» гезитиниң бу һәқтики хәвиридә, хитайдики пүтүн киноханиларниң сәйшәнбә күни аран 26 миң йүәнлик биләт сатқанлиқи билдүрүлгән. Анализчиларниң қәйт қилишичә, хитай һөкүмити корона вирусиниң контрол қилинғанлиқини илгири сүрсиму, лекин киноханиларниң әһвали у учриған иқтисади зиянниң қанчилик зорлуқини көрситидикән.

Толуқ бәт