Uyghur diyarida kinoxanilar échildi, lékin ichi qupquruq déyerlik

Muxbirimiz erkin
2020-03-26
Élxet
Pikir
Share
Print
Deadline.com Da élan qilin'ghan "Junggo koronawirus sanining aziyishigha egiship , 500+ kinoxanini qaytidin achti" namliq maqalisidin élin'ghan. 2020-Yili 23-mart.
Deadline.com Da élan qilin'ghan "Junggo koronawirus sanining aziyishigha egiship , 500+ kinoxanini qaytidin achti" namliq maqalisidin élin'ghan. 2020-Yili 23-mart.
deadline.com

Uyghur aptonom rayoni da'iriliri 16-marttin bashlap korona wirusi yuqumi seweblik taqalghan rayondiki bir qisim kinoxanilarni qayta échishqa bashlighanidi. Melum bolushiche, nöwette rayondiki hökümetke qarashliq mutleq köp qisim kinoxanilar buyruq bilen qayta échilip bolghan. Lékin shexsiy kinoxanilarning ehwali melum emes.

Buningda diqqet qozghaydighan nuqta shuki, bu qétimqi yuqumda eng burun échilghan shundaqla we eng köp échilghan kinoxanilar yenila Uyghur aptonom rayonida. Xitaydiki "Kündilik bixeterlik" namliq maliye xewerler torining bildürüshiche, ürümchidiki "Jongying altun palma" xitaydiki eng burun échilghan kinoxana iken.

Ötken hepte xitay miqyasida jem'iy 495 kinoxana échilghan. Lékin buning 23 %’ni Uyghur aptonom rayonidiki kinoxanilar teshkil qilidiken. Biz 25-mart küni ürümchidiki "Xelq kinoxanisi" gha téléfon qilip, mezkur kinoxanining bir mes'ul xadimi bilen sözleshtuq. Uning bildürüshiche, rayondiki kinoxanilar qayta échilghan bolsimu, lékin kinoxanilar qupquruq déyerlik iken.

Kinoxana xadimi: ""Sa'et 10 yérimde qoyidighan kinomiz 'qatilliq' dégen kino. Lékin tamashibin köp emes. 10 Nechche adem köridighu, deymen. Chünki, hemmisi kona kino. Biz kinoxanini dézinféksiye qilimiz. Tamashibinlarning maska taqap kirishi telep qilinidu. Kinoxanida tamashibinlar ayrim-ayrim olturidu. Birge olturushqa bolmaydu. Pütün bir kün qanche adem körgenlikini bilmeymen. Biz pütün bir kün 11-12 dek kino qoyduq. Biz yuqirining uqturushi bilen kino qoyduq. Medeniyet turmushi bolmisimu bolmaydighu. Yuqirining uqturushida bizning ishqa chüshüshimiz telep qilindi. Qoyidighan yéngi kino bolmisimu, telep boyiche kona kinolarni qoyup turduq".

U bunchilik az tamashibin bilen iqtisadi ziyanni qandaq tolduridighanliqi heqqidiki so'alimizgha, : "Bizning amalimiz yoq, belkim yuqiri ziyinimizni tölep bérishi mumkin. Ürümchining medeniyet turmushi toxtap qalsa bolmaydu, dégen yolyoruq bilen kino qoyushni bashliduq. Ular shundaq qilishimizni telep qildi. Hazir ürümchidiki jiddiy halet 4-derijige chüshürüldi. Hazir pütün puqralarning kochida masqa taqishi telep qilinidu. Kochigha chiqsingiz hemme yerde saqchi we ijtima'iy rayon xadimlirini körisiz. Ular kishilerning maskisini tekshüridu. Maska taqimighanlarning kimliki tekshürülüp derhal bir terep qilinidu. Shunga hemme adem maska bilen yürüwatidu" dédi.

Biz yene ürümchi "Xelq tiyatiri" we "1-May" kinoxanilirigha téléfon qilduq. Ularmu kinoxanilarning échilghanliqi, lékin tüzük tamashibin yoqluqini bildürdi.

"Xelq tiyatiri" ning nöwetchi xadimining bildürüshiche, "Xelq tiyatiri" échilghan bolsimu, lékin kino qoyulup baqmighan. U filim shirkitining özlirighu téxi kino filimi ewetip bermigenlikini bildürüp, shunga kino qoyalmaywatqanliqi, qachan kino filimi kelse bilet sétishni bashlaydighanliqini tekitlidi. Uning bildürüshiche, ular aptonom rayonluq filim shirkitige qarashliq bolup, ulargha kino filimi ewetse qoyalaydiken. U, bezi kinoxanilarning özining kino filimi barliqi, ularning öz aldigha kino qoyalaydighanliqini bildürdi.

Uyghur aptonom rayoni wuxende partlighan korona wirusi yuqumida xitaydiki bashqa ölke-sheherlerge qarighanda eng axirida karantin tedbiri alghan shundaqla karantin tedbirlirini eng baldur bikar qilghan rayondur. Bu jeryanda yerlik da'irilerning yuqumgha da'ir uchurlarni qattiq kontrol qilishi, mutexessisler chet'eldiki Uyghurlar we kishilik hoquq teshkilatlirini endishige salghan.

Ular karantin tedbirlirining acharchiliq peyda qilishi shundaqla yuqumning lagérlargha tarqilishi éghir aqiwetlerni keltürüp chiqiridighanliqini ilgiri sürüp, xelq'araning lagérlarda tekshürüsh élip bérishigha yol qoyulushini telep qilip kelgenidi.

Amérika kolombiye uniwérsitétining tébbiy penler tetqiqatchisi doktor muhemmet imin ependining bildürüshiche, xitayning kinoxana qatarliq ammiwi köngül échish orunlirini échiwétishi zor tewekkülchilik iken. U, buning yashan'ghanlargha zor yoshurun xewp peyda qilidighanliqini bildürdi.

Lékin doktor muhemmet iminning ilgiri sürüshiche, nöwette yuqumni kontrol qilishning waqti ötüp ketken. Shunga döletler asasliq küchini yuqumni kontrol qilishqa emes, ölümni azaytishqa qaratmaqtiken. U, xitayning ammiwi köngül échish sorunlirini échiwétishte tibbi'iy amilni emes, siyasiy amilni közde tutqanliqi, uning puqralarda bir xil bixeterlik tuyghusi yaritishqa tirishiwatqanliqini bildürdi.

Xitay dunyadiki eng chong kino baziri. Xitay kinochiliqi yéqinqi 10 yilda izchil rawajlinip, 2019-yili uning bu sahediki kirimi 64 milyard 300 milyon yüen'ge yétip barghan. Uning bu sahediki kirimi yéqinqi 10 yilda 10 hesse artqanidi. Lékin, xitay kinochiliq baziri bu qétim wuxende partlighan korona wirusi yuqumida qattiq zerbe yégen. Korona wirusi seweblik bu yil 24-yanwar küni yeni xitayning chaghan bayrimi harpisida xitaydiki barliq kinoxanilar birdek taqalghanidi.

"Jenubiy xitay seher pochtisi" gézitining bu heqtiki xewiride, xitaydiki pütün kinoxanilarning seyshenbe küni aran 26 ming yüenlik bilet satqanliqi bildürülgen. Analizchilarning qeyt qilishiche, xitay hökümiti korona wirusining kontrol qilin'ghanliqini ilgiri sürsimu, lékin kinoxanilarning ehwali u uchrighan iqtisadi ziyanning qanchilik zorluqini körsitidiken.

Toluq bet