Чақилиқтики сақчи хадими: «чақилиқта лагер йоқ, лагердикиләр корладики түрмигә вә ичкири өлкиләргә йөткәлди»

Мухбиримиз шөһрәт һошур
2020-03-13
Елхәт
Пикир
Share
Принт
Йеқинда иҗтимаий таратқуларда тарқалған корла тәвәсидә бир түркүм мәһбусларниң яки мәһбус сияқидики кишиләрниң бир җайдин йәнә бир җайға йөткиливатқанлиқи һәққидики көрүнүш. 2020-Йили март.
Йеқинда иҗтимаий таратқуларда тарқалған корла тәвәсидә бир түркүм мәһбусларниң яки мәһбус сияқидики кишиләрниң бир җайдин йәнә бир җайға йөткиливатқанлиқи һәққидики көрүнүш. 2020-Йили март.
Social Media

Йеқинқи мәзгилләрдә иҗтимаий таратқуларда корла тәвәсидә бир түркүм мәһбусларниң яки мәһбус сияқидики кишиләрниң бир җайдин йәнә бир җайға йөткиливатқанлиқи һәққидә син көрүнүшлири тарқалди. Мухбиримизниң бу һәқтики ениқлашлири давамида чақилиқ наһийәсидики бир сақчи хадими бу наһийәдә нөвәттә лагер йоқлуқи, лагердикиләрниң корладики улуғкөл түрмисигә вә хитай өлкилиригә йәткәлгәнликини илгири сүрди.

Өткән йили австралийәдики бир тәтқиқат орни корла пойиз истансисиға аит болған бир сүрәтни тарқатқан иди. Учқучисиз айропилан арқилиқ тартилған бу сүрәттә чачлири чүшүриветилгән, пут-қоли кишәнләнгән һаләттә зоңзайтип олтурғузулған вә һәр бири иккидин сақчи тәрипидин яланған 500-600 чә мәһбусниң йөткәп меңилғанлиқи көрситилгән иди. 

Тәтқиқатчилар буларниң уйғур мәһбуслар икәнликини муәййәнләштүргән болсиму, әмма уларниң нәдин нәгә йөткиливатқанлиқи ениқ мәлум болмиған, пәқәт сүрәттики бәзи йип учлириға асасән уларниң қәшқәрдин йөткәлгәнлики пәрәз қилинған иди. 

Төнүгүн тик-ток торида тарқалған бир учурда йәнә байинғолин областиға аит лозункилар есилған бир мәйданда охшаш кийингән нәччә миңлиған кишиниң маска тақиған һаләттә тизилип турған көрүниши вә уларниң йүк-тақлирини көтүрүп аптобусларға чиқиватқан һалити хәвәр қилинди. Муһаҗирәттики уйғур көзәткүчиләр бу көрүнүшләрдики кишиләрниң түрмә яки фабрикаларға йөткиливатқан лагер тутқунлири болуш еһтималлиқини пәрәз қилишмақта. 

Хитай даирилири өткән йили нәччә қетимлап лагерларниң тақалғанлиқи һәққидә мәзмуни бир-биригә зит баянатларни елан қилған һәм лагерниң тақалғанлиқиға аит қанаәтлинәрлик дәлилләрни көрситип берәлмигән иди. Йеқинда корла вәзийәттин хәвәрдар кишиләрдин бири

Байинғолин областида өткән йилдин башлап бәзи наһийәләрдики бир қисим лагер тутқунлириға җаза кесилгәнлики, уларни түрмә вә вә фабрикаларға йөткигәдин башқа, қалған қисмини корладики йеңидин пүткән зор һәҗимдики йиғивелиш лагериға топлиғанлиқини мәлум қилди. У йәнә даириләрниң буни «кәспий тәрбийә муәссәлирини системилаштуруш вә мукәммәлләштүрүш» дәп атиғанлиқини илгири сүрди

Йеқинда телефонимизни қобул қилған чақилиқ наһийәсидики бир сақчи хадими чақилиқта нөвәттә һечқандақ бир лагер йоқлуқини илгири сүрди. У лагердики тутқунларниң бир қисминиң корла билән бүгүр арисидики улуғкөл түрмисигә, йәнә бир қисминиң хитай өлкилиригә йөткәлгәнликини ашкарилиди. У чақилиқтики лагер тутқунлириниң 2018‏-йили 11‏-ай, 2019‏-йили 4-ай вә 7‏-ай болуп, җәмий үч қетимда йөткәлгәнликини тилға алди, әмма уларниң хитай өлкилиригә немә үчүн йөткәлгәнлики, уларниң нөвәттә түрмидә яки фабрикада икәнлики һәққидә мәлумат бәрмиди. У йәнә бу мәлуматларниң «дөләт мәхпийәтлики» икәнликини ишарәтлиди. 

Чақилиқта лагерниң тақалғанлиқини илгири сүргән бу хадим лагерниң ениқ қачан тақалғанлиқи һәққидә мәлумат беришкиму өзиниң һоқуқи йәтмәйдиғанлиқини әскәртти. 

Һөрмәтлик радийо аңлиғучилар, вәзийәттин хәвәрдар киши корлада ечиветиш районида янму-ян селинған лагерлардин бир қанчисиниң вивискисиниң түрмигә өзгәртилгәнликини тилға алди. Әмма бу учур рәсмий хадимлар тәрипидин техи дәлилләнмиди. Алдинқи йили корланиң ечиветиш районида 4 орунда лагер барлиқи ашкариланған иди.

Пикирләр (0)
Share
Толуқ бәт