Хенән түрмә башқуруш идарисиниң хадими: «шинҗаңдин йөткәп келингән мәһбуслар - террорчилардур»

Мухбиримиз шөһрәт һошур
2019-07-26
Елхәт
Пикир
Share
Принт
«Зимистан» торида елан қилинған уйғур районидин 2000 дәк мәһбусниң хенән өлкисидики икки түрмигә йөткәлгәнлики һәққидики хәвәр. 2019-Йили 26-июл.
«Зимистан» торида елан қилинған уйғур районидин 2000 дәк мәһбусниң хенән өлкисидики икки түрмигә йөткәлгәнлики һәққидики хәвәр. 2019-Йили 26-июл.
Photo: RFA

«Зимистан» тори хәвәр қилған уйғур районидин 2000 дәк мәһбусниң хенән өлкисидики икки түрмигә йөткәлгәнлики һәққидики учур тоғрилиқ йәниму илгириләп елип барған ениқлашлиримиз давамида хенән өлкилик түрмә башқуруш идарисиниң хадимлиридин бири бу идаридә мәхсус шинҗаңдин йөткәп келингән мәһбусларни башқуруш ишханиси тәсис қилинғанлиқини ашкарилиди. Мәзкур идаридики йәнә бир хадим уйғур райондин йөткәп келингән мәһбусларниң «террорчилар» икәнликини илгири сүрди.

Һөрмәтлик радио аңлиғучилар, уйғур районидин хенәнгә йөткәлгән мәһбуслар һәққидики ениқлашлиримиз давамида телефонимиз хенәнниң җавку түрмисигә бағланди. Бу хадимму охшашла әһвалдин мәлумат берәлмәйдиғанлиқини ейтқандин кейин, биз униңдин: «бу түрмидә шинҗаңдин йөткәлгән мәһбуслар йоқ дейәләмсиз?» дәп соридуқ. У бу соалғиму җаваб берәлмигәндин кейин, биз униңдин әһвални билмәйдиған яки җаваб берәлмәйдиғанлиқини соридуқ. У ениқ һалда билмәйдиған әмәс, бәлки җаваб берәлмәйдиғанлиқини баян қилди. Телефонимизни қобул қилған өлкилик түрмә башқуруш идарисиниң бир хадими әһвални мунасивәтлик бөлүмләрниң билидиғанлиқини ейтти. Биз униңдин мунасивәтлик бөлүмниң қайси бөлүм икәнликини сориғинимизда «кәспий бөлүм» дәп җаваб бәрди. 
«Зимистан» тори уйғур районидин хитай өлкилиригә йөткәлгән мәһбуслар һәққидики илгирики хәвиридә мәһбуслар йөткилиштин бурун бир түркүм түрмә хадимлириниң уйғур райониға берип мәхсус тәҗрибә өгәнгәнликини баян қилған иди. Радийомиз елип барған илгирики ениқлашлардиму гәнсу қатарлиқ өлкиләрдә «шинҗаңдин мәһбус йөткәш хизмити» намида мәхсус бир хизмәт тармиқи шәкилләнгәнлики мәлум болған иди. Шуңа биз мәзкур хадимидин бу идаридә «шинҗаңдин йөткәлгән мәһбусларни башқуруш ишханиси» намида бир ишханиниң бар-йоқлуқини соридуқ. Мәзкур хадим бу соалимизға «бар» дәп җаваб бәрди вә бу ишханиниң телефон номуриниму тәминлиди.

Биз уйғур районидин йөткәлгән мәһбуслар йөткилиштин аввал уларға артилған аталмиш «җинайәт» ниң характери һәққидә мәлумат соридуқ. Хенән өлкилик түрмә башқуруш идариси шинҗаңдин йөткәлгән мәһбусларни башқуруш ишханисиниң хадими «уйғур районидин йөткәлгән мәһбусларниң алаһидә башқурулуватқанлиқи тоғриму?» дегән соалимизға «әлвәттә, шундақ» дәп җаваб бәрди. Биз униңдин бу мәһбусларниң өз юртида өткүзгән «җинайәт» лириниң немә икәнликини сориғинимизда, йәни «улар сиясий мәһбусму?» дәп сориғинимизда бу хадим һеч иккиләнмәстин: «улар террорчи» дәп җаваб бәрди. Дәсләптә телефонимизни қизғин қобул қилған бу хадим соаллиримизниң давамини аңлиғандин кейин позитсийисини дәрһал өзгәртти вә телефонни қоювәтти. 

Өткән айда сабиқ мәһбус мәмәттурсун осман билән өткүзгән сөһбитимиз давамида у қамақханиниң шараити пәвқуладдә начар болғанлиқи, һәтта көпинчә мәһбуслар қамақханидин тирик чиқишиға көзи йәтмигәнлики үчүн муддити вә орни қанчилик узақ болса болсун, «һөкүмнамә» чиқсила хош болидиғанлиқи, шуңа камирдиши аблимит абдумиҗитниң хенәнгә йөткәлгәнлик һөкүмини тапшурувалғанда камердикиләрниң уни тәбриклигәнликини баян қилған иди. Әмма «зимистан» ториниң уйғур районидин 2000 дәк мәһбусниң хенәнгә йөткәлгәнлики һәққидики хәвиридә бу мәһбусларниң һәр бириниң айрим бир камирида тутуп турулуватқанлиқи, 24 саәт койза-кишәндин айрилмайдиғанлиқи, наразилиқ кәйпияти ипадиләнгән әһвал астида гундипайларниң сотсиз - нәқ мәйданда етиветиш һоқуқи барлиқи баян қилинған. Буниңдин қариғанда, уйғур районидин йөткәлгән мәһбусларниң хитай өлкилиригә барғанда өзлири тәхмин вә тәсәввур қилип бақмиған техиму еғир вәзийәткә дуч кәлгәнлики мәлум болмақта.

Пикирләр (0)
Share
Толуқ бәт