Фирансийәдики өмәр абдуқаһар аилиси корона вирусидин юқумлинип сақайған

Ихтиярий мухбиримиз әркин тарим
2020-03-31
Елхәт
Пикир
Share
Принт
Пүтүн мәмликәт миқясида вирусниң тарқилишини контрол қилиш җәрянида, таҗсиман вирусқа қарши алдини елиш тәдбирлири сүпитидә дезинфексийә дориси пүркүлгән фирансийәниң җәнубидики обагенда шәһириниң адәмсиз кочиси. 2020-Йили 31-март.
Пүтүн мәмликәт миқясида вирусниң тарқилишини контрол қилиш җәрянида, таҗсиман вирусқа қарши алдини елиш тәдбирлири сүпитидә дезинфексийә дориси пүркүлгән фирансийәниң җәнубидики обагенда шәһириниң адәмсиз кочиси. 2020-Йили 31-март.
AP

Буниңдин 4 ай бурун хитайниң вухән шәһиридә оттуриға чиққандин кейинки 4 ай ичидә пүтүн дуняға тезла ямриған корона вирусидин фирансийәниң пайтәхти париж шәһиридә турушлуқ уйғурлардин бир аилә кишилириниңму юқумлинип сақайғанлиқи мәлум болди.

Уйғур дияриниң ғулҗа шәһиридин парижға келип йәрлишип қалған у уйғур муһаҗирлардин өмәр абдуқахар әпәнди өзлириниң аилә бойичә бу вирустин юқумлинип, сақайғанлиқини билдүрди. Өмәр абдуқахар әпәндиниң ейтишичә, у, 17-март күни 10 яштики қизиниң корона вирусидин юқумланғанлиқини дәсләптә таза байқиялмиғанлиқи, қизидин кейинла аялиниңму йөтилип, қизитмиси өрләп, нәписи қисилишқа башлиғандин кейинла уларниң корона вирусидин юқумланғанлиқини билгәнликини баян қилди.

Өмәр абдуқаһар әпәнди аяли еғир ағрип йетип қелип 4-күнидин башлап өзиниңму қаттиқ йөтилип йетип қалғанлиқини, аилә бойичә корона вирусидин юқумланғанлиқини, бүгүн, йәни 30-мартқа кәлгәндә өзлириниң яхшилинип болғанлиқини баян қилди.

Өмәр абдуқахар әпәнди корона вирусидин юқумланғанлиқини байқиғандин кейин дәрһал дохтурханиға телефон урғанлиқини, дохтурниң тәвсийиси бойичә қизитмини чүшүридиған дора йәп, яхши ғизалиниш арқилиқ сақайғанлиқини ейтти.

Фирансийә 14-марттин башлап чеграларни тақап, бу дөләткә кирип-чиққучиларни тәкшүрүшни омумйүзлүк күчәйтишкә башлиди. Фирансийә мәктәпләрни, түрлүк иҗтимаий, мәдәний, тәнтәрбийә кулублирини бирдәк тақиди. 2020-Йили өткүзүш пиланланған нурғунлиған хәлқаралиқ йиғинларни, түрлүк мусабиқиләрни бирдәк әмәлдин қалдурди. Арқидин кочиға чиқишниму чәклиди. Һазир явропада италийә вә испанийәдин қалса фирансийәдә корона вирусидин өлгәнләрниң сани көп болуп, 29-март күнигичә өлгәнләрниң сани 2606гә йәткән. Өмәр абдуқаһар әпәнди бу һәқтә мәлумат бәрди.

Өмәр абдуқаһар әпәнди корона вируси аламәтлири ичидә өзини әң қийниғининиң йөтәл болғанлиқини баян қилди.

Түркийә телевизийәлиридә хитайда партлиған корона вирусини хитайниң һазир «тизгинлигән» лики, явропа вә америкада болса тез көпийиватқанлиқи, буниң түркийә иқтисадиға еғир зәрбә берипла қалмай, түркийә хәлқиниму җиддий сарасимигә салғанлиқи хәвәр қилинмақта. Түркийәдә корона вирусидин өлгәнләрниң сани 142 кә, юқумланғанларниң сани 10827 гә йәтти. Иҗтимаий таратқуларда тарқитиливатқан мәлуматларға асасланғанда истанбулдики уйғурлар арисида түркийә елан қилған тәдбирләргә риайә қилмайватқан уйғурларму көп икән.

Корона вирусиниң аламәтлири көрүлүшкә башланса немиләрни қилиш керәк? әнқәрәдики йилдирим бәязит университети теббий факултети аммиви сағламлиқ кафедраси оқутқучиси дохтур намәтҗан мәмәт әпәнди дәрһал 184-номурлуқ мәркәзгә телефон қилип өзини мәлум қилиши керәкликини тәкитлиди.

Түркийә телевизийәлиридә корона вирусидин юқумланғанлар арисида 65 яштин чоң болғанларниң нисбитиниң көплүки тәкитләнгәчкә кишиләр арисида қерилар вә кона кесәлләрниң юқумлинидикән дегән хата чүшәнчә пәйда болуп қалған. Бу һәқтә мәлумат бәргән намәтҗан мәмәт әпәнди бу һәқтә тохталди.

Биз игилигән мәлуматларға асасланғанда һәр қайси дөләтләрдә корона вирусидин юқумлинип давалиниватқан уйғурлар бар болуп, әмма өлүм вәқәси йүз бәрмигән.

Уйғурлар фирансийәдә анчә көп әмәс, әмма голландийә, германийә, белгийә, норвегийә, шиветсийә қатарлиқ явропа дөләтлиридә көпрәктур. Уларниңму нөвәттә күчлүк тәдбир еливатқанлиқи мәлум болмақта.

Пикирләр (0)
Share
Толуқ бәт