Вашингтонда хитайға қарши намайиш өткүзүлди

Мухбиримиз қутлан
2019-12-22
Елхәт
Пикир
Share
Принт
22-Декабир америка пайтәхти вашингтонда өткүзүлгән хитайға қарши наразилиқ намайишидин бир көрүнүш. 2019-Йили 22-декабир. Вашингтон.
22-Декабир америка пайтәхти вашингтонда өткүзүлгән хитайға қарши наразилиқ намайишидин бир көрүнүш. 2019-Йили 22-декабир. Вашингтон.
RFA/Qutlan

Бүгүн, йәни 22-декабир күни америка пайтәхти вашингтонда хитайға қарши наразилиқ намайиши өткүзүлди.

Америка уйғур бирләшмисиниң уюштуруши билән өткүзүлгән бүгүнки намайишқа вашингтон алаһидә райониға қошна виргинийә штати вә мариланд штатидин кәлгән уйғурлар вә йәрлик америкалиқлар болуп, нәччә йүзлигән киши қатнашти.

Қоллирида ай-юлтузлуқ шәрқий түркистан байриқи билән америка байриқини тәң көтүргән намайишчилар вашингтонниң 12-кочисидин йолға чиқип, «асасий қанун кочиси» ни бойлап йүрүш қилди. Намайишчилар америка дөләт мәҗлиси бинасиниң алдиға берип, у йәрдин йәнә кәйнигә қайтти. Йол бойи кишиләр намайишчиларға һөрмәт билдүрүп, түрлүк ипадиләр билән уларни қоллап-қуввәтләйдиғанлиқини билдүрүшти.

Намайиш җәрянида муһаҗирәттики уйғур һәрикитиниң рәһбәрлиридин рабийә қадир ханим сөз қилип, мундақ деди: «бүгүн биз вашингтонда намайиш қиливатқан мушу минутларда хоңкоңда йүз миңлиған намайишчилар уйғурларни қоллап хитай коммунист һөкүмитигә қарши наразилиқ намайиши өткүзди. Түркийәдә нәччә он миңлиған қериндашлиримиз хитайға қарши кәң көләмлик наразилиқ намайиши елип барди. Америка авам палатасида уйғур қанун лайиһиси тәстиқтин өтти. Демәк, биз ялғуз әмәс, биз йетим әмәс!» 

Намайиш җәрянида әң тәсирлик болғини ата-анилири билән биллә намайишқа кәлгән ‍уйғур балилири қоллириға вәтәндә тутқун қилинған уруқ-туғқанлириниң сүрәтлирини көтүрүп, намайиш сепиниң алдиға өтүп турди. Бу һал әтраптики кишиләрни чоңқур тәсирләндүрди. 

Алдинқи күни ахшими истанбулда өткүзүлгән зор көләмлик намайиштин кейин, 22-декабир йәкшәнбә күни хоңкоңдиму йүз миңлиған хоңкоң хәлқи қоллирида ай-юлтузлуқ шәрқий түркистан байриқини көтүрүп намайиш өткүзди һәмдә уйғурларни қоллап-қуввәтләйдиғанлиқини ипадә қилди.

Толуқ бәт