"Xelq'ara köchmenler küni" de istanbulda Uyghur medeniyiti tonushturuldi

Ixtiyariy muxbirimiz arslan
2019-12-18
Élxet
Pikir
Share
Print

18-Dékabir "Xelq'ara köchmenler küni" munasiwiti bilen istanbul waliyliqining köchmenler ishliri idarisi we zeytinburnu belediyesining birlikte uyushturushi bilen zeytinburnu kültür-sen'et merkizide "Medeniyetlerning uchrishish tügini-türkiye" dégen témida pa'aliyet ötküzüldi.

Pa'aliyette aldi bilen istanbul waliysi eli yerliqaya ependi, istanbul köchmenler ishliri idarisining mudiri rejep batu ependi we zeytinburnu sheher bashliqi ömer arisoy qatarqliqlar échilish sözi sözlidi.

Istanbul waliysi yerliqaya ependi zulumdin qachqan insanlargha anatoliyening ishiklirining ochuqluqini bildürdi.

Pa'aliyetke qatnashqan Uyghur ösmürler waliy aliy yerliqaya ependige gül-chéchek teqdim qildi we xatire resimge chüshti.

Kéyin zeytinburnu sheher bashliqi ömer arisoy söz qilip, zeytinburnuning köchmenlerdin terkib tapqan bir sheher ikenlikini, zeytinburnu kochilirida pütkül türk dunyasidin kelgen insanlarni uchritish mumkinlikini bildürdi.

Pa'aliyetke sherqiy türkistan teshkilatlar birlikini öz ichige alghan türkiyediki köpligen ammiwi teshkilatlarning mes'ulliri we ezaliri qatnashti.

Pa'aliyet dawamida türk sen'etchiler, ahiska türkliri, qazaqlar her xil sen'et nomurliri körsetti. Uyghurlargha wakaliten doktor perhat qurban tengritaghli, gülzade tengritaghli qatarliq 6 kishidin terkib tapqan Uyghur sen'et ömiki sehnige chiqip, qeshqer xelq naxshiliridin ariye, "Yariyar" qatarliq naxshilarni orundidi. Sehnide Uyghur ussulliri oynaldi.

Uningdin bashqa yene shükran qasim qatarliq 30 neper Uyghur ösmürliri milliyche kiyimliri bilen sehnige chiqip, "Uyghur dégen mushundaq", "Kök böre" qatarliq naxshilarni orunlidi.

Pa'aliyet jeryanida Uyghurlargha wakaliten sherqiy türkistan ma'arip we hemkarliq jem'iyiti Uyghur medeniyet körgezmisi achti. Uningda etles, kanway könglek, chimen doppa, chalghu sazlar, böshük, chilapcha, körpe qatarliq Uyghurlarning milliy medeniyet we örüp-adet buyumliri körgezmige qoyuldi. Uningdin bashqa körgezmide yene mehmut qeshqeri, yüsüp xas hajip qatarliq Uyghur alimliri shundaqla Uyghurlarning ijtima'iy hayatini namayan qilidighan süretler körsitildi.

Igilinishiche hazir türkiyede 190 millet, 5 milyon chet'ellik yashaydiken. Oxshimighan til, oxshimighan medeniyet we oxshimighan dinlargha ige milyonlighan insanlar yashawatqan türkiyede bundaq pa'aliyetler her yili ötküzülüp turmaqta.

Sherqiy türkistan ma'arip we hemkarliq jem'iyitining re'isi hidayetulla oghuzxan ziyaritimizni qobul qilip, bu qétimqi pa'aliyette Uyghurlarning qandaq mezmundiki sen'et nomurliri körsetkenliki we Uyghur medeniyet körgezmisining tesiri heqqide toxtilip ötti.

Uyghur sen'etkar gülzade tengritaghli xanim xelq'ara köchmenler küni munasiwiti bilen pütkül dunyadiki Uyghur muhajirlargha bir qanche éghiz yürek sözlirini ipade qildi. U mundaq dédi: "Uyghurlar milliy medeniyitini unutmisun, milliy sen'etlirini unutmisun. Uyghur medeniyiti dunyadiki sanaqliq bay medeniyetlerdin biri. Ata-anilar buni her zaman ballilargha ögetsun."

Doktor perhat tengritaghli ependi bu pa'aliyetning bügünki künde Uyghur medeniyet-sen'itini türkiyediki köp tilliq we köp medeniyetlik ijtima'iy topluqlargha tonushturushning tolimu muhimliqini tekitlep ötti.

Pa'aliyette Uyghur medeniyet körgezmisi achqan raziye xanimmu ziyaritimizni qobul qilip, bu qétimqi pa'aliyettin alghan tesiratlirini bayan qilip ötti.

Toluq bet