Инқилабчи ибраһим муһити 93 йешида үрүмчидә вапат болди

Ихтиярий мухбиримиз қутлуқ
2013-11-29
Елхәт
Пикир
Share
Принт
 Инқилабчи ибраһим муһити 93 йешида үрүмчидә  вапат болди
 Инқилабчи ибраһим муһити 93 йешида үрүмчидә вапат болди
Photo: RFA


Идиқут асмида чақниған әркинлик, мәрипәт юлтузлириниң ахириқиси, муһитилар аилисиниң роһиға варислиқ қиливатқан биридин - бир оғли, пишқәдәм зиялий, маарипчи ибраһим муһити мушу айниң 22 - күни үрүмчидә 93 йешида аләмдин өтти.

Мәрһум маарипчи ибраһим муһитиниң җиназа намизи адәм ташқинлиқи ичидә үрүмчи бәйтулмәмур мәсчитидә оқулуп, гүлсай қәбристанлиқиға дәпнә қилинди.

Зияритимизни қобул қилған мәрһум ибраһим муһитиниң оғли мәхсут муһити муһитилар җәмәтидики төт қериндаш муһитилар һәққидә тохтилип өтти.

Мәрһум ибраһим муһити 1920 - йили турпан астанидә туғулған. 1933 - Йили атиси мәхсут муһити лүкчүндики җәңдә шеһит болғандин кейин кичик атиси мәһмут муһити уни өзиниң оғуллири билән биргә қәшқәргә елип кәткән.

Ибраһим муһити дәсләптә қәшқәр юмилақ шәһәргә җайлашқан һәрбий шитабниң ичидики башланғуч мәктәптә, кейин орда алди мәктәптә оқуған. Мәһмут муһити уни «акамниң тәвәррүк оғли» дәп наһайити әтиварлап тәрбийилигән. Ибраһим муһити 1936 - йили уруқ - туғқанлири билән биргә турпанға қайтип кәлгән.

Ибраһим муһитиниң нәврә акиси абдураһман муһити турпан сиңгим еғизида гоминдаңға қарши қозғилаң көтүргәндә, ибраһим муһитиму қолиға қорал елип инқилабқа қатнашқан.

Ибраһим муһити 1948 - йили шәрқий түркистан җумһурийитиниң тәсири билән қурулған инқилабий тәшкилат - хәлқчил яшлар тәшкилатиға әза болуп киргән.

Ибраһим муһити уйғур елидики дарилфунниң йәни һазирқи уйғур университетиниң илмий бөлүмидә ишлигән. 1953 - Йили бейҗиңдики хәлқ университетиға берип,иқтисад, стастистика кәспи бойичә төт йил оқуған. Бейҗиңдин қайтип кәлгәндин кейин уйғур университетидики хизмитини давамлаштурған.

1965 - Йили мәдәнийәт зор инқилаби башланғанда,«тордин чүшүп қалған помешчик», «қара гезәндә» дәп тартип чиқилип, он йилға йеқин азап чәккән. У бу җәрянда мәктәптә пар очаққа от қалиған, яғаччилиқ қилған. Еғир җисманий әмгәккә селинип, барлиқ әркинликләрдин мәһрум қалдурулған, һәтта сөзләш һоқуқиму болмиған.

1981 - Йили сиясәт әмәлийләшкәндә, униң хизмити әслигә келип, уйғур университетиниң оқутушни електирләштүрүш бөлүмидә бөлүм башлиқи болуп ишлигән. 1985 - Йили дәм елишқа чиққан.

Пишқәдәм зиялий ибраһим муһити 90 нәччә йиллиқ өмүр мусаписидә бир қанчә дәврләрни бешидин кәчүрүп, җәң мәйданлирида қәһриманлиқ көрситип,уйғур хәлқиниң азадлиқи үчүн мунасип төһпә қошқан. Апәтлик йилларда гәрчә хорлуқ, азап - оқубәт тартқан болсиму, әмма ирадисини қилчә бошатмай милләт үчүн хизмәт қилишқа, болупму яш әвладларни тәрбийләшкә көп төһпә қошқан.

Ибраһим муһити атиси мәхсут муһити башчилиқидики муһитилар аилисиниң аилә шәҗәрисигә аит көплигән мақалләрни йезип, тәтқиқатчиларни қиммәтлик материяллар билән тәминләп, әйни вақиттики тарихий дәврниң толуқ сүрәтлинишигә һәссә қошқан зат.

Зияритимизни қобул қилған түркийә игә университетиниң профессори доктор алимҗан инайәт турпан астанидики муһитилар җәмәтиниң уйғур җәмийитидики тәсири вә уларниң уйғур мустәқиллиқ һәрикитигә, маарипиға қошқан төһписи һәққидә тохтилип өтти.

Аваз улинишидин тәпсилатини аңлаң.

Пикирләр (0)
Share
Толуқ бәт