Канадаға хитай кан ишчилирини әкелип ишлитиш мәсилиси муназирә пәйда қилди

Ихтиярий мухбиримиз гүлшән абдуқадир
2013-02-19
Елхәт
Пикир
Share
Принт
Канададики көчмәнләр вә муддәтсиз туруш салаһийити болмиғанларниң келиш мәнбәси көрсәтмиси.
Канададики көчмәнләр вә муддәтсиз туруш салаһийити болмиғанларниң келиш мәнбәси көрсәтмиси.
en.wikipedia.org

Йеқинда канада хәлқара телевизийә қанилиниң хәвәр қилишичә, канаданиң һ д дәп атилидиған мәлум бир хитай тәрәпдари кан ширкити өзлириниң бундин кейин хитай кан ишчилирини вақитлиқ ишчи визиси билән канадаға әкелип ишлитидиғанлиқини билдүргән.

Бу ширкәт хитай ишчилирини канадаға вақитлиқ ишчи визиси билән әкелип ишлитишиниң сәвәблири һәққидә тохталғанда, хитай кан ишчилириниң алаһидә иқтидари бар дегән.

Униң үстигә йеқинда хитайда зиярәттә болған канаданиң биритиш колумбия өлкисиниң аял өлкә башлиқи киристи кларк хитайниң кан ишлириға мәсул юқири дәриҗилик әмәлдарлири билән көрүшүп, хитай кан ишчилириға канадада ишләш пурсити яритип беридиғанлиқидин бешарәт бәргән.

Әмма, һ д ширкитиниң хитай кан ишчилири һәққидә бәргән бу баянатлири канада мәтбуатлирида Зор муназирә қозғиди. Канададики ишчилар уюшмилири, хитайниң канларда қорқунчлуқ һадисиләр давамлиқ йүз берип туридиған бир дөләт икәнликини, ишчиларниң бихәтәрлик еңиниң төвән икәнликини көздә тутуп,хитай ишчилириниң канадаға келип ишләшкә лаяқәтсиз икәнликини илгири сүрмәктә.

Канададики ишчилар уюшмисиниң алдинқи қатардики рәһбәрлириниң бири һесабланған стевен һунт канада хәлқара телевизийә қанилиниң зияритини қобул қилип, хитай кан ишчилири иқтидариниң канада кан ишчилиридин үстүн болушиниң мумкин әмәсликини, канаданиң кан ишчилирини тәрбийиләш тарихиниң 100 йилдин ашидиғанлиқини билдүргән. У йәнә, канада кан ишчилири һурун, қабилийәтсиз вә яки өз ишини яхши көрмәйдиғанлар әмәс икәнликини илгири сүрүп, хитай кан ишчилириниң алаһидә иқтидари болушиниң мумкин әмәсликини илгири сүргән.

Улуғ ера гезитиниң өткән йили 10-айниң 10-күнидики хәнзучә нусхисида нәқил кәлтүрүлүшичә, хитай кан ишчилирини көпләп җәлп қиливатқан канаданиң биритиш коломбия өлкисиниң мәлум бир ички материялида, хитай кан ишчилириниң канада канлириға қизиқишида йүзләрчә сәвәб болуши мумкин дәп йезилған.

Канада мәтбуатлиридин мәлум болушичә, һазир 200 дин артуқ хитай кан ишчиси канадаға келип ишләшкә илтимас қилған болуп, уларниң ишләмлири бейҗиңдики канада консулханисида сүрдүрүлмәктә икән.

Канада көчмәнләр адвокати ричард курланд улуғ ера гезитиниң зияритини қобул қилип: «бундақ зор көләмлик бир гуруппа адәмниң канадаға ишчи болуп келиши нормал әһвал әмәс, әгәр мәсилә канададики иш имканлирини қоғдаш мәсилиси дәп қаралса, у һалда канада, канадалиқ ишчиларни қобул қилиш мәсилисини чәтәллик ишчилар мәсилисидин бурун ойлишиши керәк» дегән.

Улуғ ера гезитиниң бәргән хәвәрлиридин мәлум болушичә, 2007-йили канаданиң алберта өлкисидики бир нефит канида кан гүмүрүлүп чүшүш вәқәси йүз берип, 2 хитай ишчи нәқ мәйданда өлгән, 5 нәпәр хитай ишчи еғир яриланған. Қалған хитай ишчилар дәрһал хитайға қайтурулған. Тәкшүрүш нәтиҗисидә бу ишчиларниң канада билән шерикләшкән шаңхәй енергийә вә нефит химийә ширкитиниң ишчилири икәнлики ениқланған.

Алберта өлкилик сағламлиқ вә бихәтәрлик идариси хадимлириниң һадисини инчикә тәкшүрүши нәтиҗисидә, шаңхәй енергийә вә нефит химийә санаити ширкитиниң канаданиң 53 түрлүк иш орнида сағламлиқ вә бихәтәрлик бәлгилимисигә хилаплиқ қилғанлиқи ашкариланған. Нәтиҗидә алберта өлкиси тәрәп сотқа дава ачқан. Ахирида канада соти, шаңхәй енергийә вә нефит химийә санаити ширкитиниң канаданиң иш орни бихәтәрлик вә сағламлиқ бәлгилимилиригә еғир дәриҗидә хилаплиқ қилғанлиқи сәвәбидин 2 хитай ишчисиниң өлүшигә вә 5 хитай ишчисиниң ярилинишиға сәвәб болғанлиқи һәққидә һөкүм чиқарған.

Еғир иш орни мәсулийәтсизлики билән канада хәлқини чөчүткән бу вәқә һәққидә тохталған сабиқ канада, асия тинч окян малийә ишлири катипи давид килгор: «канаданиң алберта өлкисидә йүз бәргән бу кан гүмүрүлүп чүшүш вәқәсидә көрүлгән өлүм вә ярилинишниң еғирлиқи, хитай дөләт игиликидики карханиларда ишчиларниң қилчә етибариниң йоқлуқини көрситип турупту. Хитай дөләт игиликидики ширкәтләр дуня бойичә ишчиларни қәдирлимәслик вә уларниң һаят ‏-мамати билән һесаблашмаслиқ җәһәттә алдинқи қатарда туриду» дегән.

Йеқинда, канададики бир қисим канчилиқ ширкәтлириниң хитайдин ишчи қобул қилишқа қизиқиватқанлиқи вә уларни алаһидә иқтидарлиқ дәп тәриплигәнликигә қарита, хитайда мәхсус тәкшүрүш елип бериш үчүн хитайниң шәнши өлкисигә мухбирлиқ қилип барған канада хәлқара телевизийисиниң мухбири паул җонсун хитайниң шәнши өлкисидики нурғунлиған кан ишчилирини зиярәт қилған вә хәлқара телевизийә қанилида бәргән хәвиридә хитайниң канчилиқ ишлири интайин паскина вә хәтәрлик дәп хәвәр бәргән.

Бәзи ишчилар уюшмилири болса, хитай ишчилири канадаға кәлгәндин кейин, канаданиң бихәтәрлик бәлгилимилирини яхши өгиниши үчүн уларға қаритилған инглиз тили сүпәт өлчимини чиңайтиши керәк, йәни хитай кан ишчилири канадаға ишчи болуп келиш үчүн хитайда яси дәп атилидиған инглиз тили имтиһанидин өтүши керәк дәп қаримақта.

Аваз улинишидин бу программиниң тәпсилатини аңлиғайсиләр.

Пикирләр (0)
Share
Толуқ бәт