Қундуз йүсүпниң үрүмчидә уйғур мәсилисигә аит доклат бәргәнлики ашкариланди

Ихтиярий мухбиримиз қутлуқ
2013-08-09
Елхәт
Пикир
Share
Принт
Хитайниң японийидики муавин консули қундуз йүсүп.
Хитайниң японийидики муавин консули қундуз йүсүп.
Yaponiye Osaka Xitay konsulxanisining tor betidin elindi

8 - Айниң 8 - күнидин башлап японийиниң мәлум арилидики су асти меһманханисида хитайниң японийидики җасуслуқ һәрикәтлиригә аит учурларни мунасивәтлик мутәхәссисләргә ашкарилаш вә бу тоғрисида муһакимә елип бериш йепиқ йиғини башланди.

Мәзкур йиғинда хитай җасуслуқ һәрикити мутәхәссиси сакура тәхәлуслуқ ханимниң бүгүн ашкарилиған уйғурларға аит учурида 7 - айниң 26 - күни хитайниң токйодики баш әлчиси чең юңхуа вә хитайниң осакадики сабиқ муавин консули қундуз йүсүпләрниң үрүмчидә аптоном районлуқ партком ташқи ишлар тәшвиқат бөлүми, аптоном районлуқ ташқи ишлар, муһаҗирлар ишханиси қатарлиқ орунларниң саһипханлиқида уйғур аптоном райондики 14 назарәтниң назирлириға «японийидә шәрқий түркистан мәсилисиниң юқири долқунға көтүрүлүши» дегән темида доклат бәргәнликини илгири сүрди

Сакура тәхәллуслуқ мутәхәссис ханимниң билдүрүшичә «японийидә шәрқий түркистан мәсилисиниң юқири долқунға көтүрүлүши» дегән доклат йиғиниға уйғур аптоном районлуқ дөләт бихәтәрлик назарити, җамаәт хәвпсизлик назарити, үрүмчи шәһәрлик җ х идариси вә бихәтәрлик идариси қатарлиқ сиясий қанун органлириниң хадимлиридин болуп җәмий 130 нәпәр киши қатнашқан вә йиғин йепиқ шәкилдә ечилған.

Токйодики хитай әлчиханисиниң 8 - авғусттики тор бетидики учурида токйодики хитай әлчиси чең юңхуаниң уйғур аптоном районда хитай - япон мунасивити тоғрисида доклат бәргәнлики билдүрүлгән.

Уйғур аптоном районлуқ ташқи ишлар, муһаҗирлар ишханисиниң тор бетидиму хитай әлчиханисиниң учури билән охшаш мәзмундики хәвәр берилип, хитай әлчиси чең юңхуаниң уйғур аптоном районниң рәһбәрлиридин җаң чуншйән, нур бәкри вә хуаң вейдуң қатарлиқлар билән учирашқанлиқи оттуриға қоюлған.

Һәр икки тор бетидә, доклатни хитайниң японийидә турушлуқ баш әлчиси чең юңхуаниң бәргәнлики, доклатниң асаслиқ мәзмуни японийә билән хитайниң иқтисад, маарип җәһәттики һәмкарлиқи, мәдәнийәт җәһәттики ортақлиқи шундақла икки дөләт арисидики арал мәсилиси һәмдә японийидә оқуватқан уйғур оқуғучиларниң әһвали һәққидә икәнлики дейилгән. Әмма, хитайниң осакадики муавин сабиқ консули қундуз йүсүпниң исими тилға елинмиған.

Һәммидин хәвәрдар хитай җасуслуқ ишлири мутәхәссиси сакура тәхәллуслуқ ханимниң бу қетимқи йиғинда ашкарилишичә, хитайниң осакадики муавин консули қундуз йүсүпниң чәтәлдики уйғурлар үстидин җасуслуқ қилиш һәрикити әң әвҗигә чиққан вақти 2012 - йили 5 - айда токйода ечилған дуня уйғур қурултийиниң 4 - нөвәтлик қурултийи билән бу йил 6 - айниң 18 - күнидин 30 - күнигичә болған уйғур миллий һәрикитиниң рәһбири рабийә қадир ханимниң японийидики бәш чоң шәһәрдә елип берилған уйғур кишилик һоқуқ мәсилиси тоғрисидики доклат сөзләш паалийити җәрянида көрүлгән. У сөзидә:

- Қундуз бу қетимқи уйғур аптоном районида хитай баш әлчиси чең юңхуа билән бирликтә бәргән доклатида, ялғуз японийидики шәрқий түркистан мәсилиси тоғрисидила әмәс, бәлки канада, германийә вә америкини өз ичигә алған дөләтләрдики уйғурлар тоғрисидиму кәң даирилик мәлумат бәргән. Қундуз бу доклатни тәйярлаш үчүн японийидики уйғурлар вә уйғур оқуғучилар бир қәдәр көпрәк олтурақлашқан өлкә, шәһәрләрни тәкшүрүш вә улар билән сөһбәт өткүзүш қатарлиқ шәкли өзгәргән җасуслуқ һәрикәт усуллири билән материял топлиған вә ундин башқа бир қисим уйғурларни башқа дөләтләргә ахбарат топлашқа әвәткән, - дәп көрсәтти.

Сакура тәхәллуслуқ ханим қундуз йүсүпниң бу қетимқи доклатиниң мәзмуни һәққидә тохтилип:

- Қундузниң язма доклатида японийидики шәрқий түркистан мәсилисиниң буниңдин кейинки истиқбали, японийә һөкүмитиниң шәрқий түркистан мәсилисидики тарихий вә һазирқи көз қарашлири шундақла баш вәзир шинзо абе һөкүмитиниң уйғур мәсилисигә болған буниңдин кейинки ташқи сиясити үстидә әтираплиқ тәһлил елип берилған. Қундуз японийә һөкүмәт тармақлиридики уйғур мәсилисигә көңүл бөлүватқан сиясәтчи, әмәлдарларниң тизимликини түзәш билән биргә, өзиниң җасуслуқ һәрикитигә толиму тосалғу болуватқан мәлум бир уйғур үстидин әтраплиқ материял тәйярлиған, - дәп билдүрди. У ханим сөзидә йәнә:

- Қундуз бу доклатни тәйярлаш үчүн бир айға йеқин вақит сәрп қилип язди. У, бу җәрянда токйодики хитай әлчиханиси ичидики өйидин сиртқа пәқәтла чеқмиди. Қундузниң доклати тор арқилиқ хитай ичидики мунасивәтлик орунларға әвәтилип, доклатқа пикир берилип, үч қетим қайта - қайта түзитилип әвәтилгәндин кейин, қундуз йүсүп ялғандин төт һәптилик аилисини көрүп келиш баһанисидә хитай йүрүп кәтти. Әмәлийәттә униң бу қетимқи сәпириниң характери башқичә иди, - дәп көрсәтти.

Сакура тәхәллуслуқ ханим йәнә:

- Қундуз ялғуз уйғурлар тоғрисидики ахбаратқила шүкүр қилип қалмайду. У һәтта тибәтләр тоғрисидики учурларниму көп топлиди. Қундуз 7 - айниң 28 - күнидин 8 - айниң 2 - күнигә қәдәр тибәттә зиярәттә вә тәкшүрүштә болди, - дәп әскәтти.

Йиғинға қатнашқан вә шундақла қундуз һәққидә әтраплиқ учурларға игә,әмма өзиниң нам шәрипини ашкарилашни халимиған бир ханим зияритимизни қобул қилип қундуз һәққидә тохтилип мудақ деди:

- Қундуз йүсүп үрүмчидин қайтип кәлгәндин кейин, японийидә башқичә усулда һәрикәт елип бериши мумкин. Қундуз уйғур мәсилиси билән тибәт мәсилисидә хитай коммунистлириға хизмәт көрситип юқири өрлимәкчи.

Аваз улинишидин тәпсилатини аңлаң.

Пикирләр (0)
Share
Толуқ бәт