Qunduz yüsüpning ürümchide Uyghur mesilisige a'it doklat bergenliki ashkarilandi

Ixtiyariy muxbirimiz qutluq
2013-08-09
Élxet
Pikir
Share
Print
Xitayning yaponiyidiki mu'awin konsuli qunduz yüsüp.
Xitayning yaponiyidiki mu'awin konsuli qunduz yüsüp.
Yaponiye Osaka Xitay konsulxanisining tor betidin elindi

8 - Ayning 8 - künidin bashlap yaponiyining melum arilidiki su asti méhmanxanisida xitayning yaponiyidiki jasusluq heriketlirige a'it uchurlarni munasiwetlik mutexessislerge ashkarilash we bu toghrisida muhakime élip bérish yépiq yighini bashlandi.

Mezkur yighinda xitay jasusluq herikiti mutexessisi sakura texelusluq xanimning bügün ashkarilighan Uyghurlargha a'it uchurida 7 - ayning 26 - küni xitayning tokyodiki bash elchisi chéng yungxu'a we xitayning osakadiki sabiq mu'awin konsuli qunduz yüsüplerning ürümchide aptonom rayonluq partkom tashqi ishlar teshwiqat bölümi, aptonom rayonluq tashqi ishlar, muhajirlar ishxanisi qatarliq orunlarning sahipxanliqida Uyghur aptonom rayondiki 14 nazaretning nazirlirigha "Yaponiyide sherqiy türkistan mesilisining yuqiri dolqun'gha kötürülüshi" dégen témida doklat bergenlikini ilgiri sürdi

Sakura texellusluq mutexessis xanimning bildürüshiche "Yaponiyide sherqiy türkistan mesilisining yuqiri dolqun'gha kötürülüshi" dégen doklat yighinigha Uyghur aptonom rayonluq dölet bixeterlik nazariti, jama'et xewpsizlik nazariti, ürümchi sheherlik j x idarisi we bixeterlik idarisi qatarliq siyasiy qanun organlirining xadimliridin bolup jemiy 130 neper kishi qatnashqan we yighin yépiq shekilde échilghan.

Tokyodiki xitay elchixanisining 8 - awghusttiki tor bétidiki uchurida tokyodiki xitay elchisi chéng yungxu'aning Uyghur aptonom rayonda xitay - yapon munasiwiti toghrisida doklat bergenliki bildürülgen.

Uyghur aptonom rayonluq tashqi ishlar, muhajirlar ishxanisining tor bétidimu xitay elchixanisining uchuri bilen oxshash mezmundiki xewer bérilip, xitay elchisi chéng yungxu'aning Uyghur aptonom rayonning rehberliridin jang chunshyen, nur bekri we xu'ang wéydung qatarliqlar bilen uchirashqanliqi otturigha qoyulghan.

Her ikki tor bétide, doklatni xitayning yaponiyide turushluq bash elchisi chéng yungxu'aning bergenliki, doklatning asasliq mezmuni yaponiye bilen xitayning iqtisad, ma'arip jehettiki hemkarliqi, medeniyet jehettiki ortaqliqi shundaqla ikki dölet arisidiki aral mesilisi hemde yaponiyide oquwatqan Uyghur oqughuchilarning ehwali heqqide ikenliki déyilgen. Emma, xitayning osakadiki mu'awin sabiq konsuli qunduz yüsüpning isimi tilgha élinmighan.

Hemmidin xewerdar xitay jasusluq ishliri mutexessisi sakura texellusluq xanimning bu qétimqi yighinda ashkarilishiche, xitayning osakadiki mu'awin konsuli qunduz yüsüpning chet'eldiki Uyghurlar üstidin jasusluq qilish herikiti eng ewjige chiqqan waqti 2012 - yili 5 - ayda tokyoda échilghan dunya Uyghur qurultiyining 4 - nöwetlik qurultiyi bilen bu yil 6 - ayning 18 - künidin 30 - künigiche bolghan Uyghur milliy herikitining rehbiri rabiye qadir xanimning yaponiyidiki besh chong sheherde élip bérilghan Uyghur kishilik hoquq mesilisi toghrisidiki doklat sözlesh pa'aliyiti jeryanida körülgen. U sözide:

- Qunduz bu qétimqi Uyghur aptonom rayonida xitay bash elchisi chéng yungxu'a bilen birlikte bergen doklatida, yalghuz yaponiyidiki sherqiy türkistan mesilisi toghrisidila emes, belki kanada, gérmaniye we amérikini öz ichige alghan döletlerdiki Uyghurlar toghrisidimu keng da'irilik melumat bergen. Qunduz bu doklatni teyyarlash üchün yaponiyidiki Uyghurlar we Uyghur oqughuchilar bir qeder köprek olturaqlashqan ölke, sheherlerni tekshürüsh we ular bilen söhbet ötküzüsh qatarliq shekli özgergen jasusluq heriket usulliri bilen matériyal toplighan we undin bashqa bir qisim Uyghurlarni bashqa döletlerge axbarat toplashqa ewetken, - dep körsetti.

Sakura texellusluq xanim qunduz yüsüpning bu qétimqi doklatining mezmuni heqqide toxtilip:

- Qunduzning yazma doklatida yaponiyidiki sherqiy türkistan mesilisining buningdin kéyinki istiqbali, yaponiye hökümitining sherqiy türkistan mesilisidiki tarixiy we hazirqi köz qarashliri shundaqla bash wezir shinzo abé hökümitining Uyghur mesilisige bolghan buningdin kéyinki tashqi siyasiti üstide etirapliq tehlil élip bérilghan. Qunduz yaponiye hökümet tarmaqliridiki Uyghur mesilisige köngül bölüwatqan siyasetchi, emeldarlarning tizimlikini tüzesh bilen birge, özining jasusluq herikitige tolimu tosalghu boluwatqan melum bir Uyghur üstidin etrapliq matériyal teyyarlighan, - dep bildürdi. U xanim sözide yene:

- Qunduz bu doklatni teyyarlash üchün bir aygha yéqin waqit serp qilip yazdi. U, bu jeryanda tokyodiki xitay elchixanisi ichidiki öyidin sirtqa peqetla chéqmidi. Qunduzning doklati tor arqiliq xitay ichidiki munasiwetlik orunlargha ewetilip, doklatqa pikir bérilip, üch qétim qayta - qayta tüzitilip ewetilgendin kéyin, qunduz yüsüp yalghandin töt heptilik a'ilisini körüp kélish bahaniside xitay yürüp ketti. Emeliyette uning bu qétimqi sepirining xaraktéri bashqiche idi, - dep körsetti.

Sakura texellusluq xanim yene:

- Qunduz yalghuz Uyghurlar toghrisidiki axbaratqila shükür qilip qalmaydu. U hetta tibetler toghrisidiki uchurlarnimu köp toplidi. Qunduz 7 - ayning 28 - künidin 8 - ayning 2 - künige qeder tibette ziyarette we tekshürüshte boldi, - dep esketti.

Yighin'gha qatnashqan we shundaqla qunduz heqqide etrapliq uchurlargha ige,emma özining nam sheripini ashkarilashni xalimighan bir xanim ziyaritimizni qobul qilip qunduz heqqide toxtilip mudaq dédi:

- Qunduz yüsüp ürümchidin qaytip kelgendin kéyin, yaponiyide bashqiche usulda heriket élip bérishi mumkin. Qunduz Uyghur mesilisi bilen tibet mesiliside xitay kommunistlirigha xizmet körsitip yuqiri örlimekchi.

Awaz ulinishidin tepsilatini anglang.

Toluq bet