Uyghurlar shiwétsiyege kelgen köchmenlerge kiyim - kéchek i'ane qildi

Ixtiyariy muxbirimiz ihsan
2015-11-06
Élxet
Pikir
Share
Print
Uyghurlarning shiwétsiyege kelgen köchmenlerge i'ane qilghan kiyim - kéchekliri
Uyghurlarning shiwétsiyege kelgen köchmenlerge i'ane qilghan kiyim - kéchekliri
RFA/Ihsan


Shiwétsiye döletlik téléwiziye istansining 5 - noyabir künidiki xewiride köchmenler idarisi bashliqi muxbirning ziyaritini qobul qilip, yawropagha kéliwatqan köchmenlerning gérmaniye we shiwétsiyege merkezleshkenliki seweblik, orunlashturush xizmitide zor qiyinchiliqqa duch kéliwatqanliqini, shiwétsiye hökümitining köchmenlerni qobul qilish cheklimisi éship ketkenlikini hemde qish mewsumi yétip kelgechke yene kéliwatqan köchmenlerni orunlashturushqa amalsiz ikenlikini bildürdi.

Bu yil yawropagha kelgen köchmenlerning omumi sani 700 mingdin ashqan bolup, shiwétsiye köchmenler idarisining tor bétide ashkarilighan sanliq melumatigha qarighanda, bu yil shiwétsiyege kelgen köchmenler sanning 100 mingdin ashqanliqi, ötken bir hepte ichide kelgenlerning sani 10 minggha yetkenliki bildürüldi.

Bu yilning axirigha qeder kélidighan köchmenler omumi sanning 140mingdin 160 minggha yétidighanliqi perez qilinmaqta.

Shiwétsiyediki islam jem'iyetliri birleshmisi jiddiy heriketke kélip köchmenler xizmitige, hökümetning alaqidar tarmaqliri bilen hemkarliship xizmet ishlewatqanliqini, musapirlarning sani, qish pesli yétip kelgechke bulargha jiddiy qishliq kiyim - kéchek, ediyal, yotqan qatarliq turmush lazimetlirini qobul qilidighanliqini uqturghan idi.

Shiwétsiyede pa'aliyet qiliwatqan Uyghur teshkilatliridin "Uyghur ma'arip uyushmisi" pa'al heriketlinip sitokholm etrapida yashawatqan Uyghurlargha xewer qilip, kiyim - kéchek, we bashqa turmush lazimetlik buyumlarni toplash bilen birge, melum miqdarda iqtisadiy jehettin yardemni shiwétsiyediki islam jem'iyetlirige 5 - noyabir küni yetküzüp berdi.

Biz bu heqte tepsiliy melumat élish üchün, Uyghur ma'arip uyushmisining bash katipi abdulla ehetni ziyaret qilduq.

Abdulla ehet sözide, Uyghurlarning köchmenlik hayatini béshidin ötküzgenliki, köchmenlerning hés - tuyghulirini yaxshi chüshinidighanliqini, her kishining bundaq waqitta ayrimichiliq qilmay yardem bérishining muhimliqini eskertti.

Shiwétsiyede yashawatqan xediche xanim özining köchmenlerge kéreklik buyumlarni teyyarlap bérish bilen birge, iqtisadiy jehettin yardem bergenlikini anglatti: "Köchmenlerning hazirqi ehwalini biz bek yaxshi chüshinimiz, chünki bizmu köchmenlik hayatini béshimizdin ötküzüp dölitimizdin ayrilip bu dölette yashawatimiz. Bu köchmenler jénini aliqinigha élip hayatining tehditige qarimay, nurghun japa - musheqqetlerni chékiwatidu. Biz hazirqi xatirjem turmushqa ige boluwélip, bular bilen karimiz bolmisa bolmaydu. Menmu öyümdiki yotqan we bashqa balilarning kiyilmigen kiyimlirini we azraq bolsimu pul berdim. Shiwétsiye hökümitimu barliq imkanliri bilen yaxshi orunlashturuwatidu, bizmu bu döletning puqrasi bolush süpitimiz bilen qarap turmasliqimiz kérek, dep oylaymen."

Abdulla ehed ziyaret axirida gérmaniye we shiwétsiyediki Uyghurlargha muraji'et qilip, aldigha kelgen bu pursette köchmenlerge yardem qilishqa chaqiridi.

Égilishimizche, shiwétsiyediki Uyghurlar bundin kéyinki künlerde yene bir qatar i'ane qilish pa'aliyetlirini élip baridiken.

Toluq bet