Türkiye mo yen qatarliq 100 neper xitay yazghuchisini teklip qilghan

Ixtiyariy muxbirimiz erkin tarim
2014-02-27
Élxet
Pikir
Share
Print
Nobél edebiyat mukapat sahibi mo yén muxbirlarni kütüwélish yighinida. 2012-Yili 6-dékabir, sitokholm.
Nobél edebiyat mukapat sahibi mo yén muxbirlarni kütüwélish yighinida. 2012-Yili 6-dékabir, sitokholm.
AFP

Türkiye medeniyet we sayahet ishliri ministirliqi, nobél edebiyat mukapatigha érishken xitay yazghuchi mo yenning aldinqi hepte istanbulgha kelgenlikini we bir yil ichide 100 ge yéqin xitay yazghuchini türkiyege teklip qilip türkiyeni ziyaret qildurush ish pilanining utuqluq halda axirlashqanliqini élan qildi.

Xitay shinxu'a xewer agéntliqi türkiye medeniyet we sayahet ishliri ministiri ömer chelikning "100 Neper xitay yazghuchini türkiyege teklip qilish" ish pilanining xitay yazghuchilargha türkiyening tarixiy we medeniyet bayliqlirini shundaqla tebi'iy güzelliklirini tonutush üchün purset yaritip bérishni meqset qilghanliqini éytqanliqini yazghan.

Shinxu'a agéntliqining xewiride yene, xitay bilen türkiye otturisidiki munasiwetlerning tereqqiy qilish basquchigha qedem qoyushi bilen teng xitay edebiyatigha da'ir eserlerning türk tiligha terjime qilinip, türkiye kitab bazirigha kirishke bashlighanliqi, hazirgha qeder xitay edebiyatigha da'ir 50 ke yéqin kitabning türkiye kitab bazirida tégishlik orun'gha ige bolup bolghanliqi yézilghan. Xewerde yene, türkiye bilen xitay hökümetliri otturisida tüzülgen kélishimge asasen xitay edebiyatigha da'ir yene 50 eserning neshr qilinishi üchün hemkarliq élip bérilidighanliqimu qeyt qilin'ghan.

20-Féwral küni "Zaman" gézitide élan qilin'ghan xewerde déyilishiche, xitay yazghuchi mo yen türkiyege élip barghan ziyariti jeryanida birmu muxbirning ziyaritini qobul qilmighan.

Mo yen "Zaman" géziti muxbiri murat toqay ependi bilen yolda kétiwétip qilghan söhbitide, xelq'arada özini xitayning cheklime siyasitini yaqilash bilen eyibliniwatqanliqini, xelqning pikir erkinlikini boghushning bir ré'alliq ikenlikini, emma özining bu siyasetni yaqlimaydighanliqini bayan qilghan.

Murat toqay yazghan bu xewerge asaslan'ghanda "100 Neper xitay yazghuchini türkiyege teklip qilish" ish pilanigha asasen ikki yil ichide 96 xitay yazghuchi we ziyaliy türkiyeni ékskursiye qilghan.

Bu ish pilani toghrisida köz qarashlirini élish üchün Uyghur ziyaliyliri bilen söhbet élip barduq. Söhbet nuqtimiz, türkiye-xitay hemkarliqining mezkur sahesining Uyghur dawasigha körsitidighan tesiri mesilisige a'it boldi. Doktor erkin ekrem ependi bu xil pa'aliyetlerning Uyghur dewasigha selbiy tesiri bolidighanliqini bayan qildi.

Toluq bet