FBI Хитайниң америкидики ахбарат паалийитини йеқиндин күзәтмәктә

2007-07-30
Елхәт
Пикир
Share
Принт

Америка җасуслуққа қарши туруш органлириниң юқири дәриҗилик әмәлдарлири, хитайниң америкидики ахбарат паалийитини йеқиндин көзитиватқанлиқини билдүрди. Америка федерал тәкшүрүш идарисиниң башлиқи реберт меллирниң әскәртишичә, хитайниң җасуслуқ һәрикәтлири америкиға әмәлий тәһдит пәйда қилмақта. У, америка һөкүмити хитайниң америкидики җасуслуқ паалийитигә қарши бир қатар тәдбирләрни алғанлиқини билдүрди.

Меллир өткән һәптә америка дөләт мәҗлисиниң әдлийә комитетида бәргән гуваһлиқ сөзидә, хитай җасуслири америка һәрбий техника мәхпийәтликини оғрилапла қалмай, иқтисадий учурларниму оғрилаватқанлиқини әскәртти. У, хитай җасуслириниң америкидики паалийәт даирисини "америкиға әмәлий тәһдит селиш басқучиға берип қалди" дәйду. Гәрчә бу қетимқи йиғин ашкара йиғин болсиму, лекин меллир гуваһлиқтин өткәндә хитай җасуслириниң америкидики паалийәт әһвали вә америкиниң җасуслуққа қарши тәдбирлири үстидә илгирләп тохтилишни халимиди.

Америка федерал тәкшүрүш идарисидики хадимларниң өткән һәптә америка мәтбуатлириға ашкарилишичә, мәзкур органниң сүрүштүрүш даирисидики хитай җасуслуқ һәрикитигә четилидиған дилолар 2001 -йилдин бери% 12 ашқан.

Йеқинда америка дөләтлик ахбарат мудири ишханисиниң юқири дәриҗилик бир әмәлдари, америкида 3000 дәк хитай җасуси паалийәт елип бериватқанлиқини елан қилди. Лекин хитай һөкүмити америкиниң һәрбий вә иқтисади учурлирини оғрилаватқанлиқини рәт қилип кәлмәктә. Хитай ташқий ишлар министирлиқи баянатчиси чин гаң, буниңдин бурун елан қилған бир баянатида америкиниң хитай җасуслуқ паалийити һәққидики идийисини " яман нийәтлик " дәп тәнқидлигән. (Әркин)

Пикирләр (0)
Share
Толуқ бәт