Pakistan da'iriliri: benezir buttoning ölümide el - qa'idining qoli bar

2007-12-28
Élxet
Pikir
Share
Print

Pakistan da'iriliri, aldinqi küni rawalpindida süyqestke uchrighan pakistan öktichi partiyisining rehbiri benezir buttoning ölümide el- qa'idining qoli barliqini ispatlaydighan küchlük pakitlargha ige ikenlikini bildürdi.

Pakistan ichki ishlar ministirliqi jüme küni élan qilghan bu heqtiki bayanatida qolidiki axbaratlar süyqestning keynide "el - qa'ide rehbiri" beytulla mexsudning barliqini körsetmekte, dédi. Beytulla mexsud, jenubiy weziristan qebililer rayonini baza qilghan talibanperes militanlarning rehbiri idi. Buttoning jinaza namizi jüme küni chüshürülgendin kéyin, yurtidiki a'ile qebristanliqigha yeni dadisi zulpiqar eli buttoning qebrisining yénigha depne qilindi.

Lékin buttoning ölümidin kéyin partlighan ammiwi topilanglar tinjimidi. Topilang pakistandiki jenubidiki ölkilerde bolupmu buttoning yurti sind ölkiside bir qeder keng - kölemlik bolup, hazirgha qeder 23 adem ölgen we pakistan armiyisi jenubtiki sheherlerde qoshun köpeytken. Prézidént musherrep herbiy we saqchi qisimlirigha hökümet mal - mülkini talan - taraj qilghuchilargha oq chiqirish buyruqi chüshürgen. Péshawirda musherrepni qollaydighan bir siyasiy partiyining xizmet binasi talan - taraj qilindi.

Musherrep, esebiy diniy küchlerni buttogha süyiqest qilish bilen eyiblep, hökümet emeldarlirining weqedin burun buttoni köp qétim agahlandurghanliqini ilgiri sürgen bolsimu, lékin benezir butto amérika CNN téléwiziye qaniligha burun yazghan bir xétide "eger men süyqestke uchrisam buning jawabkari musherrep" dep tekitligen. Buttoning qollighuchiliri hökümetni buttoning kishilik bixeterlikini qoghdashta yéterlik tedbir almidi, dep eyiblimekte. (Erkin)

Pikirler (0)
Share
Toluq bet