Xitay hökümiti gérmaniye bash ministirining dalay lamani kütüwalmaqchi bolghanliqigha naraziliq bildürdi

2007-09-18
Élxet
Pikir
Share
Print

Xitay tashqi ishlar torida élan qilin'ghan muxbirlarni kütiwélish yighini heqqidiki xewerlerdin melum bolushiche,-18 séntebir seyshenbe küni xitay tashqi ishlar ministirliqi bayanatchisi jyang yü muxbirlarni kütiwélish yighinida ,gérmaniye bash ministirining tibet rohani dahiysi dalay lamani qobul qilidighanliqigha qarita inkas qayturup ,gérmaniyining dalay lama ziyaritige yol bérishi , xitay bilen gérmaniye munasiwetlirige soghaq tesir körsitidu " dep naraziliq bildürgen.

Jyang yü muxbirlarning dalay lamaning gérmaniye ziyariti heqqidiki so'aligha jawab bérip" junggo hökümitining dalay lama mesilisidiki meydani éniq , shizang ezeldin junggoning bir qismi , tibet mesilisi dölitimizning ichki ishi, dalay lama peqetla diniy dahi bolmastin diniy niqap kiyiwalghan dölitimizni parchilashni meqset qilghan bölgünchi , milliy ittipaqliqni buzghuchi siyasiy sergerdan" dep eyibligen hemde xitay hökümitining her qandaq dölet hem hökümet erbablirining dalay lama bilen uchrishishigha qarshi ikenlikini tekitlep " junggo hökümiti gérmaniyining dalay lamaning her qandaq shekildiki ziyaritini qobul qilishigha qet'iy qarshi "dep agahlandurghan.

Fransiye agéntliqining bu heqte bergen xewiride körsitishiche, gérmaniye bash ministiri an'géla mérkél , -23 séntebir dalay lamani qobul qilmaqchi bolup , u "biz her qandaq dölet hökümitining qarshiliqigha qarimay dalay lamaning ziyaritige ijazet bérimiz " dégen.

Gérmaniye tashqi ishlar ministirliqining bir neper ministirining bildürüshiche ,xitay hökümiti ötken hepte gérmaniyining béyjingda turushluq elchixanisigha téléfon qilip , dalay lamaning gérmaniye ziyaritini chekleshni telep qilghan. Emma bérlin xitay hökümitining bu telipini ret qilghan. (Gülchéhre)

Pikirler (0)
Share
Toluq bet