Dalay lama bilen körüshüsh gérmaniyide bash ministir bilen sotsiyal démokratlar arisida ixtilap yaratti

2007-11-23
Élxet
Pikir
Share
Print

Gérmaniye bash ministiri an'géla mérkélning 8 - ayda tibet rehbiri dalay lama bilen körüshüshi gérmaniyide an'géla mérkél bilen uning birleshme hökümitidiki shériki sotsiyal démokratlar arisida ixtilap tughdurdi.

Sotsiyal démokratlar partiyisidin bolghan gérmaniye tashqi ishlar ministiri waltér stéynmérning mérkélni tenqid qilish herikitidin kéyin, bu qétim sotsiyal démokratlarning rehbiri kurt bék peyshenbe küni mérkélgha hujum qildi. Kurt bék, mérkélni dalay lama bilen körüshüsh xitay bilen shrödér dewride ornitilghan munasiwetke ziyan saldi, dep eyibligen.

Shrödér dewride xitay ‏- gérmaniye munasiwiti nahayiti rawaj tapqan bolsimu, lékin u, xitayning kishilik hoquq depsendichiliki we tibet hem Uyghur élidiki zorawanliqigha köz yumdi, dep eyiblen'gen idi. 2009 - Yildiki saylamda sotsiyal démokratlarning bash ministir namzati bolush éhtimali zor, dep qariliwatqan kurt békning hujumi, gérmaniye birleshme hökümitide tereplerning munasiwitini yene jiddiyleshtürüwetti. Buning aldida mérkél xanim tashqi ishlar ministiri stéymérning eyiblishini ret qilip, xitay we rusiye bilen bolghan munasiwetlerde kishilik hoquqni muhim orun'gha qoyidighanliqini shundaqla kim bilen körüshüsh- körüshmeslikke özining qarar qilidighanliqini ilgiri sürgen.

Lékin sotsiyal démokratlarning xitaydiki kishilik hoquq weziyitige köngül bölidighanliqini tekitligen kurt bék, "men shuninggha epsuslinimenki , shrödér hökümiti dewride köp tirishchanliqlar bilen ornitilghan kishilik hoquq söhbiti hazir üzülüp qaldi " deydu. Mérkélning dalay lama bilen körüshüshidin kéyin, xitay ‏, gérmaniye bilen bolghan munasiwetlerde "nazlinish" diplomatiyisi yolgha qoymaqta. (Erkin)

Pikirler (0)
Share
Toluq bet