Awstiraliye bash ministiri jon xoward béyjingning naraziliqigha pisent qilmidi

2007-06-15
Élxet
Pikir
Share
Print

Awstiraliye bash ministiri jon xoward, béyjingning dalay lama bilen körüshse, xitay - awstiraliye munasiwetliri ziyan'gha uchraydighanliqi heqqidiki agahlandurushigha qarimay, jüme küni sédnéyda awstiraliyide ziyarettiki tibet rohani dahisi dalay lama bilen körüshti. Dalay lama esli bélgiye paytexti bréyusilda ötküzülidighan tibet heqqidiki bir yighin'gha qatnashmaqchi idi. Lékin bélgiye xitayning bésimi astida yighin'gha az qalghanda dalay lamani teklip qilishtin waz kechken.

Awstraliye bash ministiri jon xoward dalay lama bilen körüshidighanliqini élan qilghan küni, dalay lama bélgiye ziyaritining bikar qilin'ghanliqini jakarlidi. Dalay lamaning körüshüshtin kéyin muxbirlargha eskertishiche, u söhbette jon xowardqa " xitay hökümiti bilen élip bériwatqan söhbitining eng yéngi tereqqiyati heqqide melumat bergen" . Jon xoward bu heptining bashliri dalay lama bilen körüshidighanliqini jakarlighandin kéyin, xitay tashqi ishlar ministirliqi bayanat élan qilip, her qandaq döletning dalay lamagha yol bérishige we uning tibet musteqilliqi dawasi qilishigha qarshi turidighanliqini bildürgen idi. Xitay tashqi ishlar ministirliqi bayanatchisi chin gang bu heqtiki bayanatida dalay lamani noqul diniy shexs emes, dep tenqidligen we dalay lamaning " uzundin béri bölgünchilik pa'aliyiti" bilen shughulliniwatqanliqini bildürgen.

Dalay lama bu sepiride yene peyshenbe küni sédnéy ayrodromida yéngi zélandiye bash ministiri hélin klark bilen uchrashqan. Dalay lama shu küni muxbirlarni kütiwilip, siyasiy telipining tibet tili we medeniyitini qoghdap qalidighan "aliy aptonomiye" ikenlikini tekrarlidi. (Erkin)

Pikirler (0)
Share
Toluq bet