Xitay dalay lamaning watikanni ziyaret qilishigha qarshi turdi

2007-11-01
Élxet
Pikir
Share
Print

Xitay da'iriliri peyshenbe küni rim watikanini tibet rohani rehbiri dalay lama bilen söhbet ötküzmeslikke chaqirip, eger watikan dalay lamani kütüwalsa bu ikki terep munasiwitige ziyan yetküzidighanliqini agahlandurdi. Buningdin bir kün burun watikan menbe'eliri papa 16 ‏- bénediktning 13 ‏- dékabirda dalay lamani kütüwalidighanliqini xewer qilghan.

Bu munasiwet bilen xitay tashqiy ishlarministirliqi bayanatchisi lyu jyenchaw peyshenbe küni bayanat élan qilip, "biz watikanning junggo xelqining héssiyatigha azar béridighan heriketlerni qilmasliqi we junggo bilen munasiwitini yaxshilaydighan konkrét heriketlerni qollinishini ümid qilimiz " dédi.

Xitay hökümiti dalay lamani bir diniy rehberla emes, tibet musteqilliqini qollaydighan xeterlik "bölgünchi" dep eyiblisimu, lékin bu gherb rehberlirining bolupmu gérmaniye bash ministiri mérkél, amérika prézidénti bush, awstraliye bash ministiri xoward, kanada bash ministiri stipan xarpérlarning dalay lama bilen yéqinqi 2 ay ichide arqa - arqidin körüshüshini we amérika dölet mejliside dalay lamagha altun midali bérilishini tosalmidi.

Lyu jyenchaw peyshenbe künki axbarat élan qilish yighinida dalay lamagha körsitilgen bu iltipatni "chüshinish nahayiti tes kéliwatidu " dep körsetti. Lyu jyenchaw, " dalay lama ya ularni aldap ketken yaki ularning junggogha qarita bir gherizi bar " deydu. Dalay lama rim papasi bilen axiriqi qétim 2006 ‏- yili 10 ‏- ayda uchrashqan idi. Dalay lamaning kéler ayda élip baridighan watikan ziyariti, rim watikan da'iriliri teripidin resmiy élan qilinmidi. Közetküchilerning eskertishiche, buningda watikan yéqindin béri xitay bilen bolghan munasiwitining yumshawatqanliqini közde tutqan bolushi mumkin. (Erkin)

Pikirler (0)
Share
Toluq bet