Awstriye bash ministiri gusénbéyr dalay lama bilen körüshti

2007-09-20
Élxet
Pikir
Share
Print

Awstriye bash ministiri gusénbéyr, peyshenbe küni wiyénada xitay da'irilirining naraziliqigha qarimay, yawropa sepiridiki tibet rohani dahisi dalay lama bilen körüshti. Awstriye hökümitining bayanatchisi swén pusswald, körüshüshning peyshenbe küni etigende élip bérilghanliqini we 45 minut dawamlashqanliqini bildürdi.

Awstriye metbu'atlirining eskertishiche, xitayning wiyénadiki bash elchixanisi bash ministir gusénbéyrning dalay lama bilen körüshkenlikige naraziliq bildürgen. Gusénbyér körüshüshtin kéyin awstriye metbu'atlirigha élan qilghan bayanatida, awstriye - xitay munasiwetlirini " nahayiti yaxshi" dep teripligen, lékin dalay lama bilen körüshkenlikini aqlap, awstriye" söhbet zémini " dep tekitligen.

Dalay lamaning yawropa sepirining kéyinki békiti gérmaniye bolup, u yekshenbe küni gérmaniye bash ministiri an'géla mérkél bilen körüshüshi mumkin. Xitay hökümiti peyshenbe küni dalay lamaning gérmaniye ziyaritini tenqid qilip, bu tibet musteqilliqini ilgiri sürüshni meqset qilghan, dep eyiblidi.

Xitay tashqiy ishlar ministirliqi bayanatchisi jyang yüyning eskertishiche, béyjing gérmaniye terepke bu ziyaret heqqidiki meydanini bildürgen we dalay lamani dindin paydilinip özining siyasyi pilanini emelge ashurmaqchi boluwatidu, dep shikayet qilghan.

Xitay hökümiti ötken hepte gérmaniyining béyjingdiki bash elchisini tashqi ishlar ministirliqigha chaqirtip, mérkélning dalay lama bilen körüshmekchi bolghanliqigha diplomatik qanallar arqiliq naraziliq bildürgen idi. Eger an'géla mérkél yekshenbe küni dalay lama bilen körüshse, bu gérmaniye bash ministirining dalay lamani tunji qétim qobul qilishi bolup qalidu. (Erkin)

Pikirler (0)
Share
Toluq bet