Шаңхәй гуруһидики дөләтләрниң парламент башлиқлири москвада йиғин ачти

2006-05-30
Елхәт
Пикир
Share
Принт

Русийә билән хитай башчилиқидики шаңхәй гуруһиға әза дөләтләр парламент башлиқлири сәйшәнбә күни москвада йиғин ечип, шаңхәй гуруһиниң һәмкарлиқини күчәйтиш мәсилилири бойичә сөһбәт елип барди.

Шаңхәй гуруһидики дөләтләрниң парламент башлиқлири учришиштин бир күн илгири русийә рәһбәрлири явропа парламентидики юқири дәриҗилик затлар билән москвада сөһбәт өткүзгән. Русийә президенти владимир путин парламент башлиқлирини кримил сарийида күтивелип, шаңхәй гуруһиниң ролини күчәйтишкә әһмийәт беридиғанлиқини билдүрди. У, " биз бу тәшкилатимизниң хәлқаравий риқабәт күчини турғузушимиз керәк " дәйду.

Шаңхәй һәмкарлиқ тәшкилати 1996 -йили қурулған. Бу йил 6 - айда бу тәшкилат қурулғанлиқиниң 10 йиллиқи хатирләнмәкчи. Көзәткүчиләрниң қаришичә, бу тәшкилат йеқинқи йиллардин бери америкиниң оттура асиядики тәсир күчигә қарши тәңпуңлаштурғучи рол ойнашни күчәйтмәктә. Өткән йили шаңхәй гуруһидики дөләтләр америкини оттура асиядин қошун чекиндүрүшкә чақирған. Владимир путин кримил сарийида парламент башлиқлириға " бизниң мәнпәтимиз шаңхәй һәмкарлиқ тәшкилатини явро - асияда муқимлиқ вә бихәтәрликниң капаләтчиси қилип қуруп чиқиш" дәйду.

Шаңхәй гуруһидики дөләтләр хитайниң шәрқий түркистан күчлирини бастуруш һәрикитини қоллап кәлмәктә. Учришиштин кейин владимир путин хитай хәлқ қурултийиниң башлиқи билән айрим сөһбәт өткүзгән. Путинниң әскәртишичә, у бу йил ичидә хитай дөләт рәиси ху җинтав билән 4 қетим учришидикән. Иран президенти әхмәдиниҗад бу органниң шаңхәйдә чақирилидиған башлиқлар йиғиниға тәклип қилинди. (Әркин)

Пикирләр (0)
Share
Толуқ бәт