Shangxey hemkarliq teshkilatidiki döletlerning térrorluqqa qarshi turush yighini échildi

2006-09-29
Élxet
Pikir
Share
Print

Shangxey hemkarliq teshkilatidiki döletlerning térrorluqqa qarshi turush emeldarliri jüme küni béyjingda toplinip, atalmish térrorchiliqqa qarshi turushni mezmun qilghan 12 türlük höjjetke imza qoyghan. Terepler bu höjjetlerning mezmunini élan qilmighan bolsimu, lékin shinxu'a axbarat agéntliqi, bu höjjetlerning hemmisi térrorchiliqqa qarshi turush bilen munasiwetlik ikenlikini xewer qildi.

Bu qétimqi yighinni shangxey hemkarliq teshkilatining térrorchiliqqa qarshi turush idarisi chaqirghan. Yighinda xitay jama'et xewpsizlik ministiri jaw yungkang "térrorchiliq, bölgünchilik we esebiylikni asas qilghan ‘üch xil küchler’, rayonning bixeterliki we muqimliqigha tehdit séliwatqan asasliq amillar " deydu. U, shangxey hemkarliq teshkilatidiki döletlerni térrorchiliqqa qarshi téximu zich hemkarlishishqa chaqirghan.

Xitay hökümiti Uyghur siyasiy öktichilirini, oxshimighan köz qarashtiki diniy zatlarni, Uyghur musteqilchilirini "üch xil küchler" dep bastursimu, lékin xitay térrorchiliqni bahane qilip, Uyghurlarni basturmaqta, dep eyiblenmekte.

Amérika tashqi ishlar ministirliqi yéqinda élan qilghan diniy erkinlik doklatida, xitayni siyasiy öktichiler we oxshimighan köz qarashtiki diniy zatlarni térrorchilar bilen oxshash orun'gha qoymaqta, dep eyiblidi. (Erkin)

Pikirler (0)
Share
Toluq bet