Hindistan bash ministiri singk xitayni ziyaret qilish üchün béyjinggha yétip keldi

2008-01-13
Élxet
Pikir
Share
Print

Hindistan bash ministiri manmixan singk yekshenbe küni béyjinggha yétip kélip, üch künlük resmiy ziyaritini bashlidi. Shinxu'a agéntliqining xewiridin qarighanda, singk béyjinggha yétip kelgende, uning aldigha xitay aliy rehberliri körüshkili chiqmighan bolup, yekshenbe küni héchqandaq resmiy uchrishish pa'aliyetliri ötküzmey , peqet béyjing shehirining mu'awin bashliqi chén'gangning hemrahliqida olimpik tenheriket yighinning qurulushlirini ziyaret qilghan hemde xitayning olimpik yighini ötküzüshke teyyarliq qilish jeryanida zor eqil parasitini namayan qilghanliqini maxtighan.

Bu manmixan singk hindistan bash ministiri bolghan 2004-yilidin buyanqi töt yil ichide birinchi qétim béyjingni ziyaret qilishi bolup hésablinidiken. Bu qétim u xitay bash ministiri wén jyabaw, dölet re'isi xu jintaw hem wu banggo qatarliqlar bilen sohbet ötküzidu hemde ikki döletning iqtisadi, meblegh sélish we hemkarliq ornitish mesilisige a'it aliy rehberler yighinida söz qilidu, shuningdek xitay rehberliri bilen az dégende besh xil kélishimge imza qoyidu.

Yéqinqi yillardin buyan ikki dölet munasiwetliri yaxshilinishqa qarap yüzlen'gen bolup, ikki dölet sodisi37 milyard dollargha yetken. Emma, ikki dölet arisida yenila köpligen ixtilaplar bar bolup, biri tibet mesilisi, yene biri chégra mesilisi bolup, 1962-yili xitay bilen hindistan chégra taliship, bir meydan qanliq jeng qilghan idi. Hindistanning yéqinqi yillardin buyanqi herbiy texnika jümlidin bashqurulidighan bomba, awi'amatka we ilghar küreshchi ayropilan téxnikiliri we bashqilar xitaydin éship ketkenliki üchün béyjingning bir milyard nopusluq bu dölet bilen yaxshi otushke tirishishqa mejbur bolghanliqi bildürülmekte. (Ümidwar)

Pikirler (0)
Share
Toluq bet