Әтләс көйнәк кийгән исландийә нахша чолпини шаңхәйдә тибәт мустәқиллиқини күйлиди

2008-03-04
Елхәт
Пикир
Share
Принт

bjork-150.jpg
Хәвәрдә ейтилишичә, бҗоркниң нахша кечилики 2 - март йәкшәнбә күни шаңхәй хәлқара гимнастика мәркизи залида өткүзүлгән. AFP Photo

Әнгилийә б б с радио ‏- телевизийисиниң хәвәр беришичә, исландийилик аммиви услубта нахша ейтиш чолпини бҗорк, хитайда өткүзгән ялғуз кишилик нахша кечиликидә әтләс көйнәк билән сәһнигә чиқип, тибәт мустәқиллиқини күйлигән.

Хәвәрдә ейтилишичә, бҗоркниң нахша кечилики 2 - март йәкшәнбә күни шаңхәй хәлқара гимнастика мәркизи залида өткүзүлгән болуп, бҗорк нахша кечиликиниң хатимисидә езилгән милләтләрниң мустәқиллиқ хитапнамиси мәзмун қилинған " мустәқиллиқ елан қилиш" намлиқ нахшини орунлап тибәт! тибәт! дәп юқири авазда күйлигән.

Шаңхәйдә олтурақлашқан әнглийилик бир тамашибинниң тәсвирлишичә, кечиликкә қатнашқан шаңхәйлик амма буниңдин раһәтсизләнгән болуп, узунға қалмай,арқа -арқидин кечиликтин чиқип кетишкән.

Гәрчә, хитай һөкүмити һәм ахбарат даирилири бу һәқтә һазирға қәдәр һеч қандақ учур елан қилмиған болсиму, әмма бәзи хитай тор бәтлиридә,гәрчә исландийилик нахша чолпини бҗоркниң ейтқан нахшисиниң мәзмунини чүшәнгүчиләр унчә көп болмисиму униң тибәт мустәқиллиқини күйлигәнликини тәнқид қилидиған муназириләр хели күчәйгән.

Б б с ниң сөрәтлик хәвиридә ипадилишигә қариғанда бҗорк нахша кечиликидә әтләстин кийим кийивалған.

Көзәткүчиләр, хитай һөкүмитиниң мәзкүр вәқәни йошурғанлиқиниң өзи, буниңға қарита сиясий сәзгүрлүкиниң ипадиси, бу вәқәдин кейин хитай һөкүмити чәтәл сәнәткарлириниң хитай ичидики паалийәтлирини йәниму қаттиқ контрол қилиши мумкин дәп қияс қилмақта. (Гүлчеһрә)

Пикирләр (0)
Share
Толуқ бәт