Isra'iliye xamas bilen söhbet ötküzüshke qarshi

2007-12-23
Élxet
Pikir
Share
Print

Isra'iliye bash ministiri ormut yekshenbe küni isra'iliye hökümitining pelestin musteqilliqi üchün küresh qiliwatqan xamas teshkilati bilen urush qilmasliq heqqide söhbet ötküzüshi mumkin emeslikini hemde isra'iliyining dawamliq türde ghezze rayonida mezkur teshkilatning qoralliq küchlirige qarshi heriket qolliniwéridighanliqini bildürdi.

Amérika awazi radi'osining bu heqte tarqatqan uchuridin melum bolushiche, ormut bu sözni isra'iliye hökümitidiki yighinda qilghan bolup, uning qarishiche, xamas ottura sherq tinchliqini qolgha keltürüshke heriket qiliwatqan döletler teripidinmu étirap qilinmighan. Belki, ormutning közde tutqini, xamas teshkilatining amérika qatarliq gherb döletliri teripidin térrorchiliq bilen eyiblen'genliki bolsa kérek.

Chünki, xamas saylam arqiliq pelestin hökümitige qatnishish pursitige ériship, fatah teshkilati bilen birleshme hökümet qurghan bolsimu, biraq gherb döletliri teripidin qollashqa érishken fatah bilen uning arisida ziddiyetler kücheygen shuningdek toqunushlar yüz bérip, birleshme hökümiti buzulghan idi. Pelestin hökümitining rehbiri maxmut abbas izchil türde amérika bashliq gherb döletliri bilen söhbet qurup, ularning qollishi arqiliq pelestin musteqilliqini emelge ashurushni meqset qilghan hemde yéqinda amérikigha ötküzülgen yighin'gha qatniship, isra'iliye bash ministiri ormut bilen hemde prézidént bush bilen körüshken idi. Biraq, xamas bolsa, isra'iliye dölitini qet'iy étirap qilmasliq shertide ching turghan bolup, bu gherb döletlirining qattiq qarshiliqigha uchrighan hemde pelestin mesilisini hel qilishqa qatnishiwatqan döletler xamastin qoralliq wasite qollinishni toxtitishni we isra'iliyini étirap qilishni telep qilghan.

Yéqinda isra'iliye terep ghezze rayonini bombardiman qilghan bolup, weqedin uzun ötmey, xamas isra'iliye bilen urush toxtitish heqqide söhbet ötküzüsh pikirini otturigha qoyghan idi. Ormut ene shu pikirge qarshi turup, ular bilen söhbet ötküzmeslik meydanini ipade qildi.(Ümidwar)

Pikirler (0)
Share
Toluq bet