Amérika xitayning kishilik hoquqini eyibleydighan qarar layihisi sunmaydiken

2005-03-17
Élxet
Pikir
Share
Print

Amérika hökümiti bu yil jenwede échiliwatqan b d t kishilik hoquq komitétining yilliq yighinida, xitayning kishilik hoquqini eyipleydighan qarar layihisi sunmasliqni qarar qildi.

Amérika birleshme axbarat agéntliqining xewer qilishiche, amérikining yighin'gha qatnishiwatqan wekili kishilik hoquq komitétidiki bashqa eza döletlerge amérikining bu qararini yetküzgen. U xitayning ötken bir yil jeryanida, kishilik hoquq saheside amérika ümid qilghan bezi ilgirileshlerni qolgha keltürgenliki üchün, bu yil xitayni eyipleydighan qarar layihisi sunmaydighanliqini bildürgen . Emma u amérikining dawamliq türde xitayning kishilik hoquq weziyitige diqqet qilidighanliqini körsetken.

Xitayning kishilik hoquq xatirisi nurghun yillardin béri, b d t kishilik hoquq komitétida munazire qilinidighan muhim témigha aylan'ghan bolup, amérika köp yillardin béri xitayning kishilik hoquqini eyipleydighan qarar layihisi sunup kelgen idi. Biraq, xitay hökümiti yéqinqi yéllardin boyan, b d t kishilik hoquq komitétida yiterlik qollashqa ériship, jazagha uchrash teghdiridin qutulalighan.

Biraq, kishilik hoquq teshkilatliri b d t kishilik hoquq komitétining xitayni eyiplimeywatqanliqini tenqid qilmaqta. Melumatlargha qarighanda, düshenbe küni jenwede bashlan'ghan b d t kishilik hoquq komitétining yighini jeryanida, bir qisim tibetler, Uyghurlar we bashqa kishilik hoquq pa'aliyetchiliri jenwege bérip, xitay hökümitige qarshi naraziliq namayishi ötküzüshni pilanlimaqta. (Arzu)

Pikirler (0)
Share
Toluq bet