Kosowada b d t tinchliq saqlighuchi qisimliri bilen sérblar toqunushti

2008-03-17
Élxet
Pikir
Share
Print

17 - Mart düshenbe küni b d t tinchliq saqlash qisimliri shimaliy kosowada sérblar igiliwalghan sotxanigha basturup kirip sotxanini qayturuwalghan bolsimu, emma bu jeryanda saqchilar bilen sérblar arisida toqunush yüz berdi.

Ötken jüme künidin bashlap sérb namayishchilar aldinqi ayda élan qilin'ghan kosowa musteqilliqigha qarshiliq bildürüp, kosowaning mitrowika shehirige jaylashqan b d t bashqurushidiki bir sotxanini igiliwalghandin kéyin, b d t we nato tinchliq saqlighuchi qisimliri mezkur sotxanini qayturuwélish üchün sérblar bilen toqunushqan hemde toqunushta az dégendimu 22 neper tinchliq saqlighuchi qisim eskiri we 8 neper nato eskiri yarilan'ghan, lékin ölüm - yétim hadisisi körülmigen.

Xewerlerge qarighanda, namayishchi sérblar sotxana aldigha yighilip b d t we nato qisimlirigha qaritip oq chiqarghan hemde granat we tash - kések atqan bolup, tinchliq saqlighuchi qisim yash aqquzush bombisi étip inkas qayturghan.

Birleshme agéntliqida neqil qilinishiche, bügün b d t we nato kosowaning paytexti pristinada birleshme bayanat élan qilip shimaliy kosowada yüz bergen " namayishchilar saqchilargha ot chiqarghan qanliq zorawanliqi " ni eyibleydighanliqini bildürdi.

Düshenbe küni kechqurun'gha yéqin b d t qisimliri mitrowika shehirining sérblar kontrolluqidiki qismidin xadimlirini yandurup chiqqan bolsimu, nato qisimliri yenila bu rayonda tertip saqlash üchün qalduruldi.

Kosowa 17 - féwral musteqilliq jakarlighan bolup, shuningdin étibaren kosowadiki sérblar her xil shekilde kosowa musteqilliqigha naraziliq bildürüp kelmekte. (Jüme)

Pikirler (0)
Share
Toluq bet