Rusiye kolléktip bixeterlik kélishimige eza döletlerge erzan bahada qoral-yaraq sétip béridu

2007-10-07
Élxet
Pikir
Share
Print

6-Öktebir küni tajikistan paytexti düshenbide kolléktip bixeterlik kélishimi teshkilatigha eza döletler bashliqliri yighini ötküzüldi. Bu yighinda 20 nechche mesile muzakire qilin'ghan bolup, asasliqi herbiy- téxnika hemkarliqi bash téma bolghan .

Rusiye uchur agéntliqining xewer qilishiche, rusiye, qazaqistan qirghizistan, tajikistan, özbékistan we bélorusiye rehberliri ishtirak qilghan kolléktip bixeterlik kélishimi teshkilatining yighinida yene kolléktip bixeterlik kélishimi teshkilati ramkisi astida tinchliq saqlash qisimliri méxanizmini shekillendürüsh hemde bixeterlik kélishimige eza döletlerning herbiy-téxnika hemkarliqi mesilisi boyiche alaqe méxanizmi tesis qilish muzakire qilindi.

Prézidéntlar iran bilen munasiwetlik yadro mesililirige nisbeten jiddiy mu'amililerde boluwatqanliqini, iran yadro mesilisining tinchliq bilen hel qilinishi kéreklikini tekitleshken hemde bu heqte yighin xitabnamisi qobul qilghan shuningdek 20 höjjetke qol qoyghan. Kélishim boyiche rusiye öz ilghar qoral-yaraghlirini ichki erzan bahada teshkilatqa eza döletlerge sétip béridighanliqini bildürgen.

Kolléktip bixeterlik kélishimi teshkilati 1992-yili sowét ittipaqi yimirilgendin kéyin tashkentte qurulghan teshkilat bolup, kéyin özbékistan buningdin chiqip ketken hemde 2006-yili qaytidin eza bolup kirgen. Mezkur teshkilat asasliq rusiyining hamiyliqidiki herbiy -siyasiy teshkilat bolup, uning ramkisi astida rusiye tajikistan we qirghizistanlarda herbiy baza qurush imkaniyitige ige bolghan.

Xewerlerdin qarighanda shenbe küni yene shangxey hemkarliq teshkilati bilen kolléktip bixeterlik kélishimi teshkilati bir qatar hemkarliq kélishimliri tüzgen bolup, kolléktip bixeterlik teshkilatida musteqil döletler hemdostluqidiki töt ottura asiya döliti we rusiye bilen bélarusiyini öz ichige alghan . Shangxey guruhi bolsa, bu döletlerdin bashqa yene xitayni öz ichige alghan bolup, közetküchiler mezkur ikki teshkilatning rusiye bilen xitayning hamiliqi astida birlishish yolini tutiwatqanliqini perez qilishmaqta. (Ümidwar)

Pikirler (0)
Share
Toluq bet