Olimpik komitéti axbarat erkinliki jehette bergen wedisini aqlimidi

2008-02-04
Élxet
Pikir
Share
Print

Düshenbe küni, bash shitabi nyu york shehirige jaylashqan bir axbarat erkinlik teshkilati xelq'ara olimpik komitétining, xitayda axbarat erkinlikini ilgiri sürüsh jehette xitaygha yéterlik bésim ishletmigenlikini otturigha qoydi.

Mezkur teshkilat, xitayning dunya buyiche " axbaratchilarni eng köp türmige tashlaydighan dölet" ikenlikini, hazirgha qeder 29 yazghuchining xitay türmiliride azap chékiwatqanliqini otturigha qoydi.

Fransiye agéntliqida körsitishiche, yazghuchilarni qoghdash teshkilati asiya bölümining mes'uli bob di'étz, xelq'ara olimpik komitétining, bu jehette héchqandaq tedbir qollanmighanliqidin "heyran" qalghanliqini ipadiligen we öz teshkilatining yilliq doklatida, xitayning we xelq'ara olimpik komitétining öz wediside turmighanliqini körsitip, " xitay xelq'ara olimpik komitétigha axbarat erkinlikini zor derijide yaxshilaydighanliqi heqqide wede bergen" dep otturigha qoyghan.

U xitayning yazghuchi we axbaratchilarni izchil qolgha élip 9 yildin buyan bu jehette dunya buyiche aldinqi qatarda turup kelgenlikini hemde xitayning hazir torda maqale élan qilghanlarni köprek qolgha éliwatqanliqini, hazirghiche qolgha élin'ghan 29 neper yazghuchining 18 nepirining torda maqale élan qilghan yazghuchilar ikenlikini bildürdi.

U xitay hökümitini bu yilliq béyjing olimpikidin burun türmide yétiwatqan yazghuchilarni qoyup bérishke chiqardi.

Hazir xitayda türmide yétiwatqan 29 neper yazghuchining ichide 4 nepiri Uyghur ilidin bolup, bularning ichide, tarixchi toxti mozart, "yawa kepter" hékayisining aptori nurmemet yasin, qeshqer edebiyatining sabiq tehriri köresh höseyin qatarliqlar bar.

Xitay 2001 - yili 2008 - yilliq olimpik yighinigha sahibxanliqni talishish aldida 2008- yilliq olimpik yighinidin burun axbaratni erkin qoyuwétishni emelge ashuridighanliqi heqqide dunya jama'etchilikige wede bergen idi. (Jüme)

Pikirler (0)
Share
Toluq bet