Пакистанда зораванлиқ вә қан төкүш һәрикәтлиридә төт күндин буян 47 адәм өлди

2007-12-31
Елхәт
Пикир
Share
Принт

Пакистан сабиқ баш министири бәнәзир бутто қәсткә учрап қаза қилғандин кейин пакистанда үзлүксиз юз бериватқан намайиш вә һәр хил зораванлиқ һәрикәтлири пакистанға пәқәт төмүр йол саһәсидила 200 милйон америка доллири иқтисади зиян елип кәлгән.

Өткән пәйшәнбә күни бәнәзир бутто равалпинди шәһиридә сайламға қатнишиш паалийити җәрянида сүйқәсткә учрап қаза қилғанлиқи тоғрисидики хәвәр ашкариланғандин кийин пакистанниң һәрқайси җайлирида, болупму бутто ханимниң юрти синдһ районида һәр хил зораванлиқ вә қан төкүш һәрикәтлири башлинип кәткән һәмдә төт күндин буян 47 адәм өлгәнлики мәлум болған иди.

Бүгүн синдһ өлкисидә анчә ‏- мунчә зораванлиқ һәрикәтлири көрүнгән болсиму, әмма һазирғичә өлүм ‏- йетим һадисиси көрүлмиди.

Ройтерс агентлиқиниң пакистан һөкүмәт әмәлдарлириниң ейтқанлиридин нәқил елип көрситишичә, зораванлиқ һәрикәтлири давамида җамаәт мүлки, асаси муәссәсә вә башқа әслиһәләргә йәткән зиян ғайәт зор болған һәмдә бу хилдики зиян ишләпчиқириш, екиспорт вә санаәтниң башқа саһәлиридиму интайин еғир болған.

Хәвәрдә көрситишичә, пакистандики төмүр йол системилириму еғир бузғунчилиққа учриған болуп, һазирғичә 22 пойиз буқиси, 140 вагон көйдүрүветилгән вә төмүр йол алақә әслиһәлири пүтүнләй вәйран қиливетилгән. Нәтиҗидә, төмүр йол системида көрүнгән иқтисади зиян 200 милйон америка доллириға йәткән.

Пакистан баш министири муһәммидин сомрониң ейтишичә, һөкүмәт һазирчә шәхсийләр учриған зиянни баһалап бикитәлмигән болсиму, бу қетимлиқ қалаймиқанчилиқта әң намрат адәмләрниң әң еғир зиянға учриғанлиқи муқәррәр икән. (Җүмә)

Пикирләр (0)
Share
Толуқ бәт