Pakistanda zorawanliq we qan töküsh heriketliride töt kündin buyan 47 adem öldi

2007-12-31
Élxet
Pikir
Share
Print

Pakistan sabiq bash ministiri benezir butto qestke uchrap qaza qilghandin kéyin pakistanda üzlüksiz yuz bériwatqan namayish we her xil zorawanliq heriketliri pakistan'gha peqet tömür yol sahesidila 200 milyon amérika dolliri iqtisadi ziyan élip kelgen.

Ötken peyshenbe küni benezir butto rawalpindi shehiride saylamgha qatnishish pa'aliyiti jeryanida süyqestke uchrap qaza qilghanliqi toghrisidiki xewer ashkarilan'ghandin kiyin pakistanning herqaysi jaylirida, bolupmu butto xanimning yurti sindh rayonida her xil zorawanliq we qan töküsh heriketliri bashlinip ketken hemde töt kündin buyan 47 adem ölgenliki melum bolghan idi.

Bügün sindh ölkiside anche ‏- munche zorawanliq heriketliri körün'gen bolsimu, emma hazirghiche ölüm ‏- yétim hadisisi körülmidi.

Roytérs agéntliqining pakistan hökümet emeldarlirining éytqanliridin neqil élip körsitishiche, zorawanliq heriketliri dawamida jama'et mülki, asasi mu'essese we bashqa eslihelerge yetken ziyan ghayet zor bolghan hemde bu xildiki ziyan ishlepchiqirish, ékisport we sana'etning bashqa saheliridimu intayin éghir bolghan.

Xewerde körsitishiche, pakistandiki tömür yol sistémilirimu éghir buzghunchiliqqa uchrighan bolup, hazirghiche 22 poyiz buqisi, 140 wagon köydürüwétilgen we tömür yol alaqe esliheliri pütünley weyran qiliwétilgen. Netijide, tömür yol sistémida körün'gen iqtisadi ziyan 200 milyon amérika dollirigha yetken.

Pakistan bash ministiri muhemmidin somroning éytishiche, hökümet hazirche shexsiyler uchrighan ziyanni bahalap bikitelmigen bolsimu, bu qétimliq qalaymiqanchiliqta eng namrat ademlerning eng éghir ziyan'gha uchrighanliqi muqerrer iken. (Jüme)

Pikirler (0)
Share
Toluq bet