Кандилиза райс: исраилийә билән пәләстинниң тинчлиқи америкиниң мәнпәәтигә уйғун

2007-11-28
Елхәт
Пикир
Share
Принт

Исраилийә- пәләстин тинчлиқ йиғини 27 ‏- ноябир күни америкиниң аннаполис шәһәрчисидә ечилип, йәттә йилдин буян үксүп қалған тинчлиқ сөһбитини давамлаштуруш үчүн келишим һасил қилди. Бу келишимни иҗра қилидиған бир комитет тәшкилләнди. У 12 ‏- айниң 12 ‏- күнидин башлап ишқа чүшиду.

Америка авазиниң хәвәр қилишичә, 28 ‏- ноябир күни америка президенти җорҗ буш ақ сарайда исраилийә президенти олмерт билән пәләстин һоқуқлуқ оргининиң рәиси мәһмуд аббасни қобул қилип, тинчлиқ сөһбити үчүн ярдәмлишидиғанлиқини билдүрди.

Хәвәрдә баян қилинишичә, америкида ечилған исраилийә-пәләстин тинчлиқ йиғиниға исраилийә билән дипломатик мунасивити болмиған сәуди әрәбистани, сүрийә қатарлиқ дөләтләрниму өз ичигә алған 50 нәччә әрәб дөлитиниң рәһбәрлири қатнашти. Йиғинда исраилийә президенти олмерт "һазир тинчлиқни әмәлгә ашуридиған пәйт кәлди, әмди әрәб дөләтлири йәнила бир янда қарап турувәрмәй, тәшәббускар тәдбир қоллиниши керәк, тинчлиқ һәммимизгә керәк" деди. Мәхмуд аббас "тинчлиқ һәммимизгә керәк, әмма исраилийә билән пәләстинниң һечқайси тинчлиқни қарши тәрәптин тиләп алмайду. Һазир қан төкүш, зораванлиқ, ишғалийәтчиликни ахирлаштуридиған пәйт кәлди " деди. Әрәб хәлипиликиниң баш катиби муса йиғинда 2002 ‏- йилидики тәклипини йәнә тәкрарлап 'исраилийә бесивалған җайлардин чиқип кәтсә, андин әрәб дөләтлири исраилийә билән мәсилини сиясий йол билән һәл қилиш җәһәттә мурәссә қилиду" деди.

Америка ташқи ишлар миниситири кандилиза райс 'буниңдин кейин қилидиған хизмәтләр қейин. Хәтири йоқ әмәс. Әмма бу йиғинниң роһи хәлқара җәмийәт талливалған бирдинбир йол, президент буш билән мән шундақ қараймизки, исраилийә билән пәләстинниң тинчлиқи америкиниң мәнпәәтигә уйғун' деди. (Вәли)

Пикирләр (0)
Share
Толуқ бәт