Rusiyide taqirbashlar herikiti kücheymekte

2007-05-15
Élxet
Pikir
Share
Print

Sowét ittipaqi yimirilgendin kéyin, rusiyide milletchilik heriketlirining jümlidin rus milletchilikining küchiyip ketkenliki melum.

Inkaslardin qarighanda, chéchen urushidin kéyin milletchilikning téximu yuqiri pellige kötürülüshke bashlighanliqi, yéngidin peyda bolghan rus milletchi yash ösmürlirining "taqirbashlar" dep atalghan guruppilirining qara chachliq millet ademlirini, bolupmu köchmenlerni urush we öltürüsh qilmishlirining köpiyishining rusiyining ichki bixeterliki hem dölet abroyigha nisbeten tehdid peyda qiliwatqanliqi rusiye qanun himayichiliri teripidin dawamliq otturigha qoyulmaqta.

Taqirbashlarning sani dawamliq ashmaqta

Rusiye metbu'atliri qanun himayichilirining rus milletchilikining ipadisi hésablinidighan "taqirbashlar" herikitining barghanséri küchiyip, jemiyet amanliqigha tehdid peyda qiliwatqanliqini yézishmaqta.

Rusiyede chiqidighan intérnét tori “newsru” ning tarqatqan uchurlirigha asaslan'ghanda, hazir rusiyidiki "taqirbashlar"ning sani 70 mingdin ashqan bolup, ikki yilning aldida 50 ming etrapida bolghan. Nöwette, "taqirbashla"ning sani artipla qalmastin belki, ularning ademlerge hujum qilish qilmishliri her küni dégüdek, öltürüsh qilmishliri her heptide dégüdek yüz bermekte.

Intérfakis agéntliqining moskwadiki insan hoquqini qoghdash byurosining mudiri aléksandir brodning sözidin neqil keltürüp uchur bérishiche, rusiye sheherliride radikal milletchilik teshkilatliri milletler ara öchmenlik peyda qilidighan lozunka astidiki ammiwi heriketlerni élip bérishqa urunmaqta.

Taqirbashlarning qolida ölgenler köpeygen

"Taqirbashlar"ning qolida ölgenlerning sani yildin -yilgha köpeymekte. Intérfakis agéntliqining moskwa insan hoquqini qoghdash byurosining mudiri aléksandir brodning istatistikiliq melumatliridin neqil keltürüshiche, 2007-yili, yanwardin aprilghiche bolghan töt ay ichide pütün rusiyide 80 qétim irqchiliq tüsi alghan hujum yüz bergen bolup, netijide 25 adem ölgen, 80 adem yarilan'ghan.

Bu jeryanda 21 adem milliy öchmenlik keypiyati keltürüp chiqarghan dégen jinayet bilen sotlan'ghan. Emma, bashqa menbelerde mezkur töt ay ichide "taqirbashlar " teripidin 200 qétim hujum sadir qilinip, netijide 25 ademning öltürülgenliki we 154 ademning yaridar qilin'ghanliqi éytilghan.

Taqirbashlarning hujum nishani kimler?

Rusiye fashist milletchiliri dep qariliwatqan taqirbashlarning hujum nishani chirayi yawropa tipigha oxshimaydighanlar bolup, “newsru” torining xewerlirige asaslan'ghanda, ularning asasliq hujum nishani, kawkazliqlar jümlidin ezerbeyjanlar, gruzinlar, ermenler we ottura asiyadin kelgen özbékler, tajiklar hem asiyaliqlar yeni koréyilikler, xitaylar shuningdek afriqiliqlardur.

Yéqinqi künlerde " taqirbashlar"ning hujumigha uchrighan kishi xitay puqrasi liyu yang bolup, u moskwa qatnash inistitutining oqughuchisi idi. U, 1-may küni " taqirbashlar" teripidin poyiz üstide urup yarilandurulghan.

" Taqirbashlar"ning asasliq pa'aliyet rayonliri moskwa, sanktpétérburg, rostow, wladiwostok, orénburg, saratow we bashqa chong sheherlerdin ibarettur. Bu jaylarda köchmenler biraz köp jaylashqan.

"Sowa" merkizining tor bétidin ashkarilinishiche, 1-may küni milletchiler moskwa shehiride marsh dessep namayish ötküzgen bolup, ular " yoqalsun köchmenler ! ma'ashlar öltürülsun ! " her xil renglik ademler memlikiti ruslargha emdi kérek emes !" dégendek sho'arlarni towlighan. Bu heriketke "qanunsiz köchmenlerge qarshi turush herikiti", " milliy birlik", " rus tertipi" qatarliq milletchi teshkilatlarning 500 din artuq adimi qatnashqan. Inkaslardin qarighanda, xelq'araliq insan hoquqi teshkilatliri we qanun himayichiliri rusiye hökümitining "taqirbashlar"ning bu xil heriketlirige nisbeten jiddiy chare -tedbirlerni qollanmaywatqanliqini tenqid qilghan. (Ümidwar)

Pikirler (0)
Share
Toluq bet