Хитай сақчилири бейҗиңға әрзигә маңған хоңкоң демократлирини чегрида тосувалған

2007-12-28
Елхәт
Пикир
Share
Принт

Хитай хәлқ қурултийи хоңкоң валиси зең миңчүәнниң хоңкоңда демократик ислаһат тоғрисидики доклатини шәнбә күни музакирә қилишдин бурун, бейҗиңға берип хитай даирилиридин хоңкоңға демократийә беришни тәләп қилмақчи болған хоңкоң парламент әзалирини хитай сақчилар шенҗин таможнисида тосувалған.

Хоңкоң парламент әзаси ляң гохуңниң әскәртишичә, у 4 нәпәр демократик зат билән пәйшәнбә күни бейҗиңға бармақчи болуп шенҗинға киргәндә пуқрачә кийингән сақчилар уларни таможнида 30 минуттәк тутуп турғандин кейин хоңкоңға қайтуруветип, уларниң ичидики бир кишиниңла бейҗиңға беришиға рухсәт қилған. Ляң гохуң, сақчиларниң йенидики хәт ‏- чәк, материял вә бейҗиң даирилиригә сунидиған илтимаслирини мусадирә қилғанлиқини билдүрди. У, "хоңкоң хәлқиғә вакалитән бейҗиңға демократийә тәләп қилидиғанлиқимизни йәткүзүш бизниң мәсулийитимиз" дәйду.

Хитай хәлқ қурултийи даимий комитети шәнбә күни хоңкоң валиси зең миңчүәнниң хоңкоңда демократик ислаһат һәққидики доклатини музакирә қилиду. Доклатта, зең миңчүән хоңкоң валисини 2017 - йили омуми хәлқ биләт ташлап сайлап чиқиш пикирини оттуриға қойған болуп, хоңкоңдики демократик күчләр кечиксә 2012 - йили сайлап чиқишни тәләп қилмақта иди. Лекин ройетирс ахбарат агентлиқиниң җүмә күни әскәртишичә, хитай хәлқ қурултийи хоңкоң валисини 2012 - йили сайлаш пикирини рәт қилиши мумкин.

Хоңкоң авам партийисиниң парламент әзаси ронний таң, ройетирс агентлиқиға бәргән баянатида " бу хоңкоң хәлқи үчүн арқиси кәлмәйдиған йәнә 10 йил кечикиш дегәнликтур " дәйду. Хитай хәлқ қурултийи 2004 - йили хоңкоң түп қанунини чүшәндүрүш һоқуқиниң өзидә икәнликини җакарлап, 2007 вә 2008 - йиллири омуми хәлқ сайлими елип бериш тәлипини рәт қилған. (Әркин)

Пикирләр (0)
Share
Толуқ бәт