Хитай һөкүмити, америка қошун чекиндүрүш тоғрисидики тәләпләр һөрмәт қилиши керәк, деди

2005-07-12
Елхәт
Пикир
Share
Принт

Хитай ташқи ишлар минстирлиқиниң баянатчиси лйү җәнчав, америка һөкүмити америка һәрбий қисимлирини оттура асиядин чекиндуруш үчүн ениқ бир күн бәлгиләш тоғрисидики тәләпләргә һөрмәт қилиши керәк, деди.

У сәйшәнбә күни бейҗиңда мухбирларға бәргән баянатида, оттура асия дөләтлири америкиниң башчилиқида районда елип берилған террорчилиққа қарши урушқа қатнашти. Лекин һазир вәзийәт өзгәрди, дегән.

Өткән һәптә шаңхәй һәмкарлиқ тәшкилатиға әза дөләтләрниң дөләт вә һөкүмәт рәһбәрлири қазақистанниң пайтәхти астанида өткүзүлгән алий дәриҗилик йиғини җәрянида, бирләшмә баянат елан қилип, америка һөкүмитини оттура асиядики һәрбий қисимлирини қачан чикиндүридиғанлиқи тоғрисида ениқ бир күн бәлгиләшкә чақирған иди.

Йәкшәнбә күни қирғизистанда өткүзүлгән президент сайлимида ғәлибә қилип, авазларниң мутләқ көп қисмини қолға кәлтүргән қирғизистанниң вақитлиқ президенти қурманбек бақийеф дүшәнбә күни бәргән баянатида, шаңхәй һәмкарлиқ тәшкилатиниң чақириқиға параллел һалда, америка һәрбий қисимлириниң қирғизистанда туруш мәсилиси қайтидин музакирә қилиниши керәк, деди.

Америка ташқи ишлар министири кондализа райис йәкшәнбә күни хитай зиярити җәрянида бейҗиңда бәргән баянатида, афғанистанда террорчилиққа қарши урушниң һелиму давамлишиватқанлиқини тәкитләп, шаңхәй һәмкарлиқ тәшкилатиниң америка һәрбий қисимлирини оттура асиядин чекиндүрүш үчүн ениқ бир вақит бәлгиләш тоғрисидики тәлипини рәт қилған. Әмма, америка һөкүмити техи бақийефниң баянатиға рәсми бир җаваб қайтурмиди.

Америка бирләшмә агентлиқиниң билдүрүшичә, бейҗиң һөкүмити, америка һәрбий қисимлириниң хитайниң ғәрбий чегрисиға йеқин бир районда мәвҗут болуп турушидин вә райондики енергийә мәнбәлириниң хитайға еқишиниң тосалғуға учришидин қаттиқ әндишә қилидикән. (Қанат)

Пикирләр (0)
Share
Толуқ бәт