Béyjing péntagonning doklatidiki "xitay yoshurun tehdit" qarishini ret qildi

2006-02-07
Élxet
Pikir
Share
Print

Xitay hökümiti seyshenbe küni bayanat élan qilip, amérika dölet mudapi'e ministirliqining yéqinda élan qilghan doklatida xitayni amérika üchün "yoshurun tehdit " dep qarighanliqini eyiblidi we washin'gtonni amérika jama'et pikirini xata yolgha yiteklesh bilen tenqid qildi.

Besh burjeklik binaning doklati ötken jüme küni élan qilin'ghan bolup, péntagon béyjingning herbiy xirajetni köpeytiwatqanliqi we chégra rayonlarda herbiy eslihelerni kücheytiwatqanliqidin endishe tuyuwatqanliqini tilgha alghan.

Xitay tashqiy ishlar ministirliqi bayanatchisi kung chüen, amérika terepning doklatini "junggoning normal dölet mudapi'e tereqqiyati heqqide asassiz eyibleshlerde boldi. Junggoning ichki ishlirigha arliship, junggo herbiy tehdit neziriyisi arqiliq jama'et pikirini xata yolgha yiteklimekte " dep tenqidlidi. Kong chüenning eskertishiche, xitay amérika terepke béyjingning doklattin tuyghan bi'aramliqini " keskin türde uqturghan " emma u, muxbirlargha buning tepsili ditallirini ashkarilimidi. U, " biz asiya - tinch okyan rayoni we dunyaning tinchliqi we bixeterlikini saqlaydighan muhim küch. Biz héch bir waqitta tehdit bolmiduq, bolmaywatimiz we bolmaymiz " deydu.

Amérika dölet mudapi'e ministirliqining doklatida, "junggo chong dölet we yéngi bash kötürüwatqan küch bolush süpitide amérikining eng chong herbiy riqabetchisi bolup qalmaqta. Junggo amérikining en'eniwi herbiy üstünlikige taqabil turush üchün yoqitish xaraktérlik herbiy téxnikilarni tereqqi qildurush éhtimalliqi eng zor dölettur " dep agahlandurghan.

Prézidént jorji bush, bu yilqi amérika herbiy xam chotini 439 milyard dollar, dep élan qildi. Shuning bilen birge xitaylar 2 yérim milyon kishilik herbiy qoshunini zamaniywilashturush yolida herbiy xam chotini yildin yilgha köpeytmekte. Xitay da'iriliri yilliq herbiy xam chotini 30 milyard dollar etrapida,dep élan qilsimu, emma közetküchiler xitay herbiy xam chotining emeliyettiki sani 90 milyard dollargha yétidu, dep qarimaqta. (Erkin)

Pikirler (0)
Share
Toluq bet