Хитайда , күнигә 13 адәм көмүр кан һадисисидә өлиду

2007-12-31
Елхәт
Пикир
Share
Принт

Хитайниң шәрқий шималида кан өрүлүш вәқәси йүз берип 19 адәм кан астида қелип қаза қилған болуп, хитай ахбарат васитилириниң хәвәр қилишичә, бу йил ичидә хитайда йүз бәргән әң йеңи кан өрүлүш һадисиси икән.

Шинхуа агентлиқиниң хәвәр қилишичә, 29- чесла шәнбә күни хейлуңҗяң өлкиси мудәнҗяң шәһиригә җайлашқан шүнфа көмүр канида партлаш йүз берип, көмүр кан дивари өрүлүп чүшкән вә икки күн давамлашқан қутқузуш һәрикити давамида 19 ишчиниң җәсити байқалған.

Мәлум болушичә бу көмүр кан шәхсийләр игидарчилиқидики кан болуп, партлаш йүз бәргәндә 21 адәм қудуқ астида хизмәт қиливатқан икән.

Хитайда 5 милйондин артуқ көмүр кан ишчиси бар болуп , булар дуня буйичә әң хәтәрлик кан қудуқлирида мәшғулат қилиду.

Хитай көмүр кан қудуқлирида йүз берип туридиған от кетиш, су бесип кетиш, партлаш қатарлиқ һадисиләр һәр йили нәччә миңлиған адәмләрниң җениға замин болуп кәлмәктә.

Хитай һөкүмәт тармақлириниң хәвәр қилишичә, 2006- йилида пүтүн хитай миқясида көмүр кан һадисисидә өлгән адәм сани 4750 болуп, күнигә оттура һесаб билән 13 адәмдин тоғра келидикән.

Техи бу айниң бешидила шәнши өлкисидә йүз бәргән көмүркан партлаш һадисисидә 510 адәм өлгән иди. (Җүмә)

Пикирләр (0)
Share
Толуқ бәт