Хитай, 15 йиллиқ муһит қоғдаш пиланини елан қилди

2006-02-15
Елхәт
Пикир
Share
Принт

Хитай һөкүмити чаршәнбә күни бир чоң көләмдики 15 йиллиқ муһит қоғдаш пиланини елан қилди һәмдә муһит мәсилисиниң җәмийәт муқимлиқиға тәсир көрситиватқан муһим амилға айланғанлиқини тунҗи қетим етирап қилди.

Хитай дөләт кабинти чиқарған "илмий тәрәққият қаришини әмәлийләштүрүп, муһит асрашни күчәйтиш тоғрисидики қарар" намлиқ бу пиланда, кәлгүси 15 йил ичидә булғинишниң алдини елиш асасий нуқта қилинған муһит қоғдаш нишани бекитилгән.

Мәзку пиланда, су булғинишиниң алдини елиш, шәһәр муһитини асраш хизмитини күчәйтиш, тупрақ булғинишиниң алдини елиш вә йеза-қишлақларниң муһитини қоғдашқа охшаш бир қатар алдин әһмийәт беришкә тегишлик муһим вәзипиләр көрситилгән.

Хитай муһит қоғдаш идарисиниң башлиқи җу шеңшйән нөвәттә хитай муһит вәзийитиниң 3 чоң еғир пәллигә дуч кәлгәнликини ейтти. Улар болса, биринчиси, муһит булғиниши әң еғирлашқан мәзгил йетип кәлгән. Иккинчиси, туюқсиз йүз беридиған муһит һадисилири юқири пәллигә йәткән. Үчинчиси, колликтип характерлик муһит һадисилириниң йүз беришиму тез көпәйгән.

Җу шеңшйән йәнә, муһит булғинишиниң еғирлишиға түрткә болуватқан муһим бир амилниң, чириклик мәсилиси икәнликини ейтип, бу мәсилиләрниң хитайниң җәмийәт муқимлиқиға җиддий тәсир көрситиватқанлиқини әскәртти. (Пәридә)

Пикирләр (0)
Share
Толуқ бәт